CJARGNE. Çurçuvint: Une bibie sot il cîl

In ocasion de ricorence dal titolâr de Plêf di Sant Martin, ai 11 di Novembar, a Çurçuvint al è stât screât il progjet “Une bibie sot il cîl”.
“Il progjet si insede tal troi di religjositât e di spiritualitât che te piçule comunitât di Çurçuvint e à tancj segnâi sparniçâts pal paîs, pal bosc, pes tavielis, pai cjamps e pai prâts”, al conte il librut vuide stampât pe ocasion dal comitât organizatîf.
Inte prime fase dal progjet a son stâts sielzûts tai tescj biblics dîs moments di fonde de storie de salvece e a son stâts dâts in man al iconograf Paolo Orlando che al à realizât dîs stampons di dissens. Chescj stampons a son stâts mudâts in oparis di art de scuele dai Mosaiciscj dal Friûl di Spilimberc.
In cheste zornade a son stâts distaponâts e benedets dal vescul Andrea Bruno Mazzocato i prins cuatri mosaics che a rapresentin la creazion, il sacrifici di Isac, l’esodi e il don de leç. I mosaics ai son di grandis dimension e a son stâts metûts in cuatri parêts di fabricâts publics e privâts che si cjatin ator de place de glesie dal paîs. Chestis oparis si podaran viodi ancje di gnot in gracie de  luminarie metude a disposizion de societât eletriche de zone.
La cerimonie dal licôf e je stade fate inte carateristiche Plêf di Sant Martin e e je stade pardabon origjinâl e significative: un moment indulà che la peraule di Diu proclamade cu lis leturis biblichis in lenghe furlane si è alternade aes melodiis antighis dai salms proponudis de pluricentenarie Onorande Compagnie dai Cjantôrs.
“In chest paîs si lavore par une cualitât elevade”, al à dit Don Alessio Geretti che – dutune cul  vescul Mazzocato – al à incoragjât il progjet. “Su lis stradis a àn di jessi dutis lis indicazions stradâls par capî benon indulà che si à di lâ. Chês che vuê o inaugurìn invezit a son lis indicazions viers l’alt. Nus impensin cemût e parcè lâ indevant. La culture e prodûs segnâi e oparis di art che a coventin a visânus di ce che o volìn pensâ, provâ e fâ devant di chel che nus capite te vite di ogni dì. A Çurçuvint si comence cul ordin che Diu comande.”
Al è il prin pas che la piçule comunitât di Çurçuvint e à fat vierzint la puarte a une gnove propueste che, tal incjant da la art, e met in lûs e e da valôr ae Peraule di Diu, restant tal troi dal tradizionâl e ben plantât patrimoni di fede e di culture. ■
Marta Vezzi