CJARGNE. Avocats in moviment

I avocats a son simpri in moviment par difindi il Tribunâl di Tumieç: tantis lis iniziativis che a van indevant sul teritori cjargnel. Intal mês di Març, in forme di proteste, i avocats a àn ocupât il Tribunâl dì e gnot par doi dîs: si son tignudis cunvignis, riunions publichis, visitis vuidadis pai students. Tra lis iniziativis, la leture de Costituzion: ogni articul al è stât let di diviers volontaris tant par talian che par furlan.
In chest periodi, sedi par lâ indenant cu la racuelte des firmis de petizion sedi par slargjâ lis informazion a plui citadins, i avocats a son daûr a organizâ incuintris tai diviers comuns cjargnei.
La leç 148/11 e stabilìs che il guvier al vedi di adotâ un o plui decrets legjislatîfs par riorganizâ la distribuzion sul teritori dai ufizis judiziaris par rivâ a sparagnâ lis spesis. ‘La eventuâl sieradure dal Tribunâl di Tumieç no zovarès ni a sparagnâ e tant mancul a aumentâ di eficience’, al dîs l’ordin dai avocats di Tumieç:
– il teritori montan al cjape dentri 44 comuns confinants cun Austrie e Slovenie mediant di 7 varcs; 2.430 chilometris cuadrâts (cuasi metât de Provincie di Udin e 0,81% dal teritori nazionâl): la sopression dai uficis e puartarès il prin presidi de justizie a plui di 100 km di distance dai confins;
– lis infrastruturis a son scjadintis (la autostrade e la ferovie a cuvierzin dome la Val Cjanâl – Cjanâl dal Fier, lassant fûr dute la Cjargne) e di tancj paîs a coventin plui di dôs oris di viaç cui mieç publics par rivâ a Udin;
– la presince di une des 14 presons di massime sigurece (la uniche a nord est) e il confin cun doi stâts a rinfuarcin inmò di plui la idee di mantignî sul teritori il Tribunâl e la Procure de Republiche;
– il teritori dal circondari di Tumieç si presente no omogjeni e l’acorpament cui uficis di Udin al larès a peiorâ la eficience ancje dai uficis acorpants.
Cence contâ lis conseguencis che a colaressin come modons sore di cheste tiere di mont za plene di dificoltâts. La sieradure dal Tribunâl e puartarès a un altri dispopolament, ae pierdite di puescj di lavôr, ae privazion di servizis essenziâi e a un dam a nivel economic: daûr di un studi fat dai comercialiscj di Tumieç, ai citadins cjargnei lâ a Udin ur costarà cirche 2.000.000 di euros.
E cussì, prin il Tribunâl, dopo i uficis postâi, lis scuelis… Prime che nus puartin vie dut o vin par fuarce di fâ sintî la nestre vôs di proteste cumò: doman al podarès jessi masse tart! ■
Marta Vezzi