CJARGNE. Apollo Prometeo Candoni: figure storiche cjargnele impuartante

In ocasion dal centenari de nassite, ai 24 di Setembar dal 2011, a Darte e je stade dedicade une cunvigne ae figure dal cjargnel Apollo Prometeo Candoni. Prometeo al è nassût tal prin paîs de Cjargne: Damâr. La sô zoventût no je stade facile: mateant cui vanzums de prime vuere alc i è sclopât devant, comprometintji par simpri la viste. Ma la sô inventive lu à puartât a vê tantis sodisfazions intal cjamp de imprenditorie: emigrât in France, al à tacât a fâ morsets e po, tal timp, in gracie de sô idee di produsi fanâi, e je nassude la Seima taliane. Partide cun 140 dipendents, intai agns la Seima e je cressude fin a rivâ a vê, tal 2000, cirche 720 dipendents. Vuê la Seima (che cumò si clame Automotive Lighting) si cjate intal centri de Europe e chest al è di impuartance fondamentâl par podê coltivâ benon i propris rapuarts economics cui paîs dongje. E furnìs Fiat, Alfa, Lancia, Audi, Bmw, Mercedes, Opel, Volvo, Saab, Ferrari, Maserati. Prometeo al è stât un om coragjôs e che al à simpri dimostrât un leam fuart cu la sô tiere.
E par rivuart di cheste figure e je nassude la Associazion Culturâl intitulade propit a Apollo Prometeo Candoni cun tancj progjets di puartâ indevant, e tra chescj chel di dâ vite a un museu industriâl de Cjargne. Nol mancje il contat cul mont de scuele, dulà che la figure di Candoni e je stade fate cognossi ai fruts dal Istitût ISIS Solari di Tumieç: cul materiâl cjapât sù (ricercjis storichis e tecnichis), i students a àn metût adun un filmât interessant dal titul “L’om, l’imprenditôr… la inovazion”.
Propit tal mês di Setembar di chest an, la Associazion e à volût consegnâ trê borsis di studis, tal non di Apollo Prometeo Candoni e dal fi Walter, a ancjetancj students cjargnei mertevui tal troi de lôr preparazion al mont dal lavôr.
Cu la sô ativitât, la Associazion e intint puartâ il propri contribût par fâ cognossi aes gnovis gjenerazions esemplis concrets di ce che si pues fâ in cheste tiere, di simpri penalizade. In Cjargne, di fat, a son un grum di realtâts lavorativis ativis che, pûr cun fadie, a rivin a tignî dûr e a dâ lavôr a tante int dal puest: la cartiere di Tumieç e di Davâr, la Solari di Prât, la stesse Seima, e v.i.
A son dutis piçulis realtâts che, ancje se si cjatin lontanis dai centris economics impuartants, a continuin a dimostrâ che si pues inmò cjalâ indevant e pensâ di vê un doman in Cjargne. ■
Marta Vezzi