Sfuei Mensîl Furlan Indipendent
Archivi de Patrie

Cjargna ti saluda

Dree Venier

La rivoluzion copernicane
vive e concrete di Pre Toni

Il 25 di Avrîl dal 2007 al reste une date memorabile par Glesie Furlane e par dut il Friûl. In chê dì, fieste di S. Marc, a Visepente si celebravin i funerâi di pre Antoni Beline cuntune glesie colme di int pierdude fra lagrimis, marums e preieris intant che lis bandieris de acuile furlane a svoletavin sul sagrât.
◆ Fra ducj i intervents di chês esecuiis, o ricuardi: Cjargna ti saluda, da tô int di Rualp, Dincuan Treli, das plêfs di San Martin e di San Zuan. O speri che nissun, scoltant, al vebi in chê dì pensât: “Tabele di nons, folclôr, sprocs di int fûr dal mont”; o soi però sigûr che par pre Toni, chel al è stât il regâl plui biel dal so funerâl.
◆ Al è un scrit incorât; al comence fasint memorie dai paisans che pre Antoni al cognosseve no tant pal non anagrafic ma par chel sorenon che la vite di paîs ur veve blecât intor; al continue disint che lis personis a son achì parcè che a ti àn volût ben coma ca si vûl ben ai lôr. Àn capît subit che tu eras come lôr, ca tu eras lôr, un esiliât su la tiera e un slontanât coma lôr, un biât Crist che al paiava di persona pas sôs ideas e pa sô coerença, un puar Crist. Al conclût cuntun sconsolât: Cui cumò varaial plui il coragjo… domandis o miôr un berli dai pierdûts, lament che nol à nuie ce invidiâ ae supliche/preiere disperade da I Turcs tal Friûl di Pier Paolo Pasolini.
◆ O podìn meti Cjargna ti saluda dongje a un salm de Bibie li che o laudarai il Signôr par dute la mê vite parcè che Diu no ur dinee la sô providence ai tibiâts, ai afamâts, presonîrs, vuarps, forescj, vuarfins e veduis impen che lis trainis dai triscj al savolte (Sal 146).
◆ Di cheste int tibiade e jere fate la religjon che pre Antoni al amave; li che i predis no si dan da fâ par indutrinâ midiant di rîts e di devozions, ma si metin a vivi cu la int ae maniere dal Mestri, dal Jesù dai vanzelis. Cussience, dignitât, veretât, rispiet, justizie, a vevin di formâ une comunitât di fameis li che nissun al ven smenteât o escludût.
◆ Par chel che al cognòs i timps, e jere une rivoluzion copernicane, un meti in prin plan il popul di Diu, i laics, i Furlans, oms e feminis intal spirt dal Concili Vatican II (1962-1965); siums che a restin ancjemò utopiis se pape Francesc al continue a bati che o vivìn tune glesie infestade de peste buboniche dal clericalisim e dai laics clericalizâts.
◆ A dî il vêr, ce che pre Antoni e Glesie Furlane a puartavin indevant fra i suspiets di cierts ambients catolics al jere ce che ancje la curie di Udin e cirive di imbastî. Di fat, propit tal Jugn dal 2007 cuasi dusinte predis de diocesi insiemi cul vescul bons. Pieri Brollo si jerin dâts dongje par trê dîs residenziâi a Lignan su: “Lassâsi supâ de umanitât de int come Jesù, om e mestri di relazions”. Il motîf dal incuintri al jere: indreçâ il predi a deventâ om di dialic in maniere gnove, e ancje, formazion di un laicât responsabil in prevision des plevaniis cence predi.
◆ Dome che la curie e studiave, e rifleteve, e discuteve, e faseve teoriis, e ciclostilave documents intant che Glesie Furlane e meteve in pratiche lant pe sô strade.
O stoi leìnt il libri “La stampa cattolica friulana dal risorgimento al fascismo” di Carlo Rinaldi. La croniche dai timps nus presente un clericât e un laicât catolic furlan preparât, libar, sclet, dotât di une autonomie che in dì di vuê no si le viôt nancje cul binocul.
Nol è un biel moment, ancje parcè che la nestre societât e je jentrade in plen te etât de tecniche e e sta cjavalgjant viers la inteligjence artificiâl: al sta cambiant il nestri cerviel e il mût di viodi il mont intant che te religjon o sin fers tune pastorâl patriarcjâl di altris timps aromai superâts.
◆ Spieli stralusint di chest salt a son lis gnovis gjenerazions che a bandonin la glesie a pleton.
Pre Antoni e Glesie Furlane a àn simpri risolt i problemis pastorâi metint al centri de atenzion e scoltant la int cu la sô vite e lenghe, cul so sens religjôs popolâr di vanzeli, cui siei progrès culturâi, cirint di dâ dongje une comunitât che vuê le clamin “inclusive” parcè che e je vierte a ducj. Ducj… ducj… ducj… come che al dîs pape Francesc; ma chel ducj alì al jere za dentri vîf e concret in chel Cjargna ti saluda e te azion pastorâl dal grup di GF dai agns ’70 dal secul passât incà.
◆ Al sta rivant bons. Riccardo Lamba, il nestri gnûf vescul che o ricevìn cun dut rispiet e grandis sperancis come che i Furlans a àn simpri fat. Al ven des metropolis di Milan e di Rome e si cjatarà a fâ di pastôr te rusticitas de glesie di Aquilee.
Espert di moviments e di corints modernis di pinsîr, che al vebi, tai agns, di cjatâsi di famee e content fra di nô tune glesie multietniche, siore di storie passade ma puare tal presint. Che il Signôr i dedi la gracie di scoltâ il popul di Diu che al è in Friûl e di deventâ peraule di chei che no àn vôs. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +