CJAMINANT TE STORIE. Lis ultimis dal sgjâf di Atimis

Chest an o vin volût vierzi une gnove rubriche par presentâ dutis chês realtâts archeologjichis dal Friûl che, magari cussì no, a son mancul cognossudis ma no par chest mancul impuartantis. Par fâ chest o vin domandât la colaborazion de Societât Furlane di Archeologjie che dal 1989 si impegne cetant su dut il teritori par valorizâ e promovi il nestri patrimoni culturâl.
Lis ultimis dal sgjâf
di Atimis
Al inizi dal an o vevin vierte cheste rubriche su la archeologjie fevelant propit dai cjistiei di Atimis, une zone de pedemontane siore di olmis dal passât, in particolâr cui Cijstiei Superiôr e Inferiôr (che o podês tornâ a lei achì: www.lapatriedalfriul.com, numar di Zenâr/Fevrâr 2013).
La Societât Furlane di Archeologjie e à inviât une gnove campagne di sgjâfs dai 29 di Lui fint ai 13 di Avost propit tal Cjistiel Superiôr, cussì o vin sintût l’archeolic Giovanni Filippo Rosset (colaboradôr de rubriche) par fânus contâ lis ultimis dopo dai lavôrs.
I intervents si son concentrâts tes stanziis C e D cu la asportazion di teren lant daûr dai strâts che ben a planc a vignevin fûr, assegnant a ogni repert la sô epoche. Inte stanzie C al è stât metût in lûs un paviment fat cuntun batût di malte taponât di materiâi vignûts jù daspò di une distruzion, un miscliçot di malte, “cocciopesto” e tocs di ceramiche grese, plui altris mancul comuns come maioliche arcaiche che si pues datâle tor il XIII e il XIV secul.
Intai agns passâts il sgjâf al jere za rivât intun nivel di teren steril inte stanzie D (o ben dulà che no si varès plui cjatât nuie), invezit chest an si è concentrât il lavôr intai puescj dulà che il dipuesit archeologjic al jere inmò intat e ben conservât. Di un strât une vore penç formât cun scarics di pieris, prontât par bonificâ e eliminâ il dislivel dal teren naturâl, a son vignûts fûr une schirie di tocs di ceramiche grese di vâs, cjadins e altris contignidôrs par cuei e par conservâ il mangjâ; vanzums pe plui part costituîts di vues di cjavris, suins e bovins, a testemoneance dal fat che i abitants dal cjistiel a seguivin une diete une vore siore di cjar, sedi che a fossin stâts siors o puars, nobii o militârs, artigjans o servidôrs.
A son stadis cjatadis dôs monedis inmò di studiâ; une vore di ogjets di fier come clauts di variis misuris e piçui imprescj, scarts di fier, vâl a dî che e jere une discrete ativitât artesanâl.
La ceramiche, element util pe datazion, nus dîs che cheste stanzie e pues jessi datade tra il XII e il XIII secul.
Altris elements impuartants che a son vignûts fûr a son doi tocs di contignidôrs di veri di buine fature, inmò in cors di studi, che a son testemoneance di une cierte bondance tra i abitants dal cjistiel: un toc al è un cuel di butilie colôr ambre e chel altri un ôr di plat di colôr vert.
Al sgjâf a àn partecipât i socis de Societât Furlane di Archeologjie e cualchi membri dal Grup Archeologjic Torinês. ❚
Venusia Dominici e Giovanni Filippo Rosset