Cividât e je stade sielte tant che ambientazion principâl pes ripresis di un cine di finzion tra i 20 di Jugn e i 14 di Lui dal 2023, che al sarà ambientât pal plui intal complès monastic di Sante Marie in Val. Il film, cul titul provisori Little Trouble Girls al è direzût de regjiste slovene emergjente Urška Djukić, za premiade pal so lavôr precedent e che e à cjapât l’EFA (European Cine Awards) e il Premi César. E je une coproduzion tra Staragara I.T., cjase di produzion cinematografiche cun sede a Gurize, SPOK, cjase di produzion cinematografiche slovene e IZAZOV 365, cjase di produzion cinematografiche cravuate.
◆ Little Trouble Girls al è un cine di formazion, che al conte la storie di une corâl di feminis zovinis che, in preparazion di un conciert, e va in ritîr intal convent di Sante Marie in Val a Cividât, dulà che la protagoniste e je cjapade dentri tes problematichis tipichis de adolessence. Il cine al à otignût il contribût dal Film Fund de bande di FVG Film Comission – PromoTurismo FVG e la sô realizazion e je stade finanziade dal Ministeri de Culture, di Centris Cinematografics di Slovenie e Cravuazie, dal Fonts pal Audiovisîf dal F-VJ, e dal fonts european MEDIA.
◆ Il Comun di Cividât al à concedût un supuart impuartant al progjet metint a disposizion il Munistîr di Sante Marie in Val e colaborant cun bon profit midiant dai uficis Turisim e Tecnic.
◆ Little Trouble Girls al è ambientât in dì di vuê; a saran protagoniscj, di là dal Munistîr di Sante Marie in Val, lis viis carateristichis dal centri e il Puint dal Diaul, simbul de citât di Cividât, lis rivis dal flum Nadison, in particolâr lis splazutis di Biarç e di Tei e Muz, i salts di aghe dal Kot e la grote sugjestive di San Zuan dal Landri.
◆ Une setantine di personis tra atôrs, professioniscj dal setôr e maestrancis tecnichis, talianis e slovenis, a saran ospits de citât par un mês di ripresis. ❚
Cividât sielzude tant che ambientazion pal gnûf film de regjiste slovene Urška Djukić
