Sfuei Mensîl Furlan Indipendent
Archivi de Patrie

Cence pôre intes zonis plui “cjaldis” di vuere dal mont

servizis di Erika Adami
Dania Cossa a Benin City, tal stât di Edo, in Nigjerie, cuntune des feminis dal Re Oba

La esperience di Dania Cossa in senaris complès come Afghanistan e Donbass

«O ai 42 agns e o crôt di vê vivût cinc vitis». Dania Cossa e à passe 15 agns di esperience intes relazions internazionâls e istituzionâls in ambients critics e zonis di vuere, in Paîs multiculturâi e multietnics, tant che la Ucraine, l’Afghanistan e la Nigjerie, e prime ancjemò intal Parlament European. A ‘nt fevele cun passion e la braùre di vê simpri dât dut ce che al jere di dâ «par fâ la diference, par fâ dal ben».
◆ Di un an incà e vîf a Viene li che e lavore tant che funzionarie dal Ministeri dal Forest talian distacade ae Organizazion pe sigurece e la cooperazion in Europe (Osce), la plui grande organizazion interguviernative di sigurece regjonâl pe promozion de pâs, dal dialic politic, de justizie e de cooperazion in Europe, nassude, in plene vuere frede, tant che forum di dialic e confront. Impleade intal ufici de segretarie gjenerâl Helga Maria Schmid, in particolâr inte unitât des relazions esternis, si ocupe di partenariâts intal Mediterani e de mapadure des ativitâts, strategjiis e prioritâts de cooperazion esterne de Osce.
◆ E pe Osce, dal 2018 al 2020, e je stade a vore intal Donbass, regjon orientâl de Ucraine ocupade dal 2014 di separatiscj filorùs che a àn dât vite a dôs republichis indipendentis: la Republiche popolâr di Donetsk e la Republiche popolâr di Lugansk, ricognossudis de Russie. La funzionarie furlane, te suaze de Mission speciâl di monitorament a Donetsk, domandade di Kiev, e jere responsabile di une scuadre di 450 personis, dislocadis su 3 sedis e impegnadis a patuliâ il teritori li che a jerin scuintris, o par sconzurâju, a tignî di voli e riferî su la situazion, e a facilitâ il dialic tra lis parts in conflit. «No mi visi une zornade compagne di chê altre. Ogni dì al sucedeve alc», e ricuarde. «O jerin sistemâts intun albierc, o vevin regulis rigorosis di seguî, oraris bandîts di rispietâ. Li, intun dai teritoris plui minâts dal mont, o ai imparât il sens di responsabilitât pal gno grup. O tiravi flât la sere, savint che ducj a stevin ben. Ma – e zonte – no vevi pôre par me. No tu puedis vêle, se tu decidis di fâ ciertis esperiencis inte vite. E no lis ai fatis dal sigûr pai bêçs, ma par judâ la int dal puest a stâ miôr. Nô dal Osce – unic organisim internazionâl presint intal teritori ocupât ucrain cu la Crôs rosse internazionâl – o podevin pardabon cambiâ la vite di ogni dì des personis. A Donetsk, tra indipendentiscj, di une bande, e l’esercit ucrain, di chê altre, e je une centrâl idriche che e servìs passe un milion di personis, dantji aghe nete. Ogni dì une coriere e puartave uns 50 civîi a vore te centrâl. Trê patuliis de Osce ju tutelavin di eventuâi atentâts e, protezint i operaris, a siguravin che la centrâl e continuàs a funzionâ».
◆ Doi acuardis otignûts a Minsk, in Bielorussie, a àn metût fin intal 2015 ai combatiments su largje scjale, ma trupis ucrainis e separatiscj a continuin a frontâsi in scuintris no continuis e di intensitât variabile, dilunc dai 470 chilometris de “linie di contat” che e taie in doi il Donbass e che e divît i teritoris restâts governatîfs di chei passâts ai indipendentiscj. In 7 agns a son stâts 14 mil i muarts tra civîi e militârs, 1,8 milions i dispatriâts internis, intune cjadene di dolôr, esposizion cuotidiane al pericul e vitis peadis a no si sa cuâl destin. Diviers i fermait il fûc – l’ultin un an za fa –, ma «lis violazions a son cuotidianis», e conferme Dania Cossa. «Il presit plui alt lu pain i civîi, milions di personis che si sa pôc o nuie, in podê di ecuilibris politics e economics plui grancj di lôr. O speri che si cjati prime pussibil une soluzion politiche par miorâ lis lôr cundizions di vite».
◆ Tra lis tantis esperiencis vivudis ator pal mont, «agns bielissims» a son stâts chei in Afghanistan, dal 2012 al 2016, ancje se «o jerin in plene vuere e o ai pierdût tancj amîs». Di Kabul, Dania Cossa e à coordenât jutoris umanitaris e iniziativis di cooperazion al svilup finanziadis de Italie par passe 60 milions di dolars. «O vin tirât sù ospedâi, fat rivâ miedis specializâts in ustions di armis di fûc, costruît stradis e infrastruturis ancje cul jutori di altris organizazions, puartât indevant programs di educazion intes scuelis e di formazion des feminis. O vin fat tancj intervents par favorî la mobilitât de int mutilade par vie des minis. Mi impensi ancjemò une fantate, cognossude intune riunion, che e veve puartât lavôrs di cusît fats di personis disabilis. No veve lis gjambis. Une cotule lungje e scuindeve lis protesis. Epûr si moveve cun disinvolture e e jere contente. A son chestis personis a dâti a ti, che tu âs vût une vite ben plui facile de lôr, la motivazion par fâ alc, par tornâur sperance intun avignî di sest». Ma par creâ svilup, miorâ i servizis, meti lis fondis par un tiessût sociâl plui san intun Paîs sdrumât dai conflits, segnât de insigurece, infraidît de coruzion, «tu âs di imbastî un rapuart di fiducie cu lis personis, cu lis comunitâts locâls. Cence imponi nuie. Ancje se lu à fat cun buinis intenzions, la comunitât internazionâl e à sbaliât a imponi la proprie vision di democrazie, i siei valôrs, cence declinâju ai costums dal puest. Cussì, tu fasis plui mâl che ben. Se tu incoragjis lis feminis a lâ in machine – un dirit no ricognossût, ma sometût a aprovazion e cetancj limits –, ma no tu educhis i lôr oms, il risultât al è che, cuant a tornin a cjase, chês feminis li a cjapin plui pachis di prime», e sclarìs Dania. E cumò la situazion e je ancjemò plui complicade. L’Afghanistan al è al colàs. Sot de gjestion talibane, il stât nol rive plui a garantî i servizis minims essenziâi ae int, la inflazion e je lade sù che mai, e je miserie di bens di prime necessitât, tant che robe di mangjâ e medisinis. «No mi darès di maravee se ca di un pôc e vignìs acetade une gnove mission militâr internazionâl».
In Nigjerie, dal 2008 al 2010, Dania e à colaborât cu la polizie locâl e di frontiere, e si è ocupade di prevenzion e contrast ae trate di zovinis e fruts bande la Italie, midiant dal inviament di progjets di formazion. «Si insegnave un mistîr aes fantatis di mût di divoltâlis a partî o par judâ chês che, dopo di jessi stadis sfrutadis in Italie, a vignivin mandadis indaûr e la famee lis refudave». Une esperience impuartante e une grande lezion di vite. «O soi rivade ta chest Paîs cui miei mûts di fâ ocidentâi, la mê vision dal lavôr, de eficience e de produtivitât. Un funzionari de polizie locâl – che al veve studiât in Ocident –, dopo vêmi scoltade, mi à subite metude in rie, fasintmi capî, cun calme e buine gracie, che o varès vût jo di adatâmi ai ritmis dal puest, aes usancis de int, e no il contrari. Al veve reson. Intune tiere foreste, tu vâs cun umiltât, mai cuntun ategjament di superioritât. Cussì o ai fat. E mi àn simpri tratade come une regjine».
◆ Ciert, «jessi femine no mi à judât a lavorâ in ambients critics e in zonis di vuere. In Afghanistan, o ai sintût il dispresi di plui di cualchi om dal puest: jo femine, bessole, a vore intal forest… ma o ai savût simpri tignîur bot, cence pôre, cun fermece e educazion. Il limit al è tal nestri cjâf. O ai simpri agjît pal ben de int, convinte che lis competencis a prevalin sul gjenar». ❚

…………………………………………………………………………..

«O ai vistude la divise ancje par amôr dal nono»

«Gno nono al voleve che o deventàs militâr. Lu varès fat cun onôr, ma za di fantate o vevi chê di fâ une cariere internazionâl». La divise, ae fin, Dania Cossa le à vistude, e cun cetante braùre. Dal 2014, di fat, fuarte di un siôr curriculum, di une esperience professionâl adeguade, maduride ancje intal forest, daspò di une selezion une vore dure e di un periodi di preparazion al Comant pe formazion e Scuele di aplicazion dal Esercit a Turin, e je jentrade cul grât di tenent inte Risierve selezionade dal Esercit talian, intal Cuarp di comissariât. La Risierve e je formade di uficiâi di complement: civîi che a vegnin selezionâts pes lôr competencis di interès pe Fuarce armade.
◆ La ultime esperience di riserviste e je stade a Capua, tai mês di Març e Avrîl stâts, tant che conseire politiche dal Comandant de Division Acqui pe preparazion de esercitazion de Nato “Defender Europe 2021”. ❚

…………………………………………………………………………..

Il profîl di Cossa

Dania Cossa, classe 1979, origjinarie di Tarcint, diplomade tal Liceu sientific “Magrini” di Glemone, si è laureade in Siencis diplomatichis internazionâls te Universitât di Bologne dopo di un tirocini inte Ambassade taliane a Washington DC, tai Stâts Unîts.
◆ Dal 2005 al 2008 e à lavorât intal Parlament european – tra Milan, Bruxelles e Strasburc – tant che consulente politiche e a cjâf dal ufici stampe de europarlamentâr Cristiana Muscardini. Po e je rivade la seconde lauree, in Dirit internazionâl, te Universitât di Udin, e il master in Economie aziendâl par dirigjents di alt nivel ae Hec di Parîs, une des scuelis di economie plui prestigjosis tal mont.
◆ E à madurît passe 15 agns di esperience intes relazions internazionâls e istituzionâls in ambients critics e zonis di vuere (Nigjerie, Afghanistan e Ucraine).
◆ Tenent de Risierve selezionade dal Esercit talian, gjornaliste, e vîf a Viene dulà che e je impleade te Organizazion pe sigurece e la cooperazion in Europe (Osce), ma e à cjase in Friûl, li che e torne a pene che e pues. «Lu viodevi come une realtât di provincie, che mi limitave, ma cul passâ dal timp o ai capît trop ben che si sta in Friûl. O ai lavorât ator pal mont, cognossût personis ecezionâls, o ai fat ce che o sintivi just par me, e chest in gracie di mê mari e di gno pari. Ce che o soi vuê, al è merit dal lôr plen sostegn. Un doman mi viôt a fâ consulencis, viazant di mancul e poiade simpri di plui in Friûl. La mê tiere mi clame». ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +