Cence Junqueras, Puigdemont e Comín e ven fûr la nature clopadice de UE

Il Stât spagnûl al va dilunc a fâi cuintri
al esercizi dai dirits politics dai trê eurodeputâts
Ai 2 di Lui e je stade screade in maniere uficiâl la ativitât dal gnûf Parlament European e in chê stesse zornade i guviers dai stâts membris a àn cjatât l’acuardi pe atribuzion des funzions plui impuartantis de Union Europeane (UE): lis presidencis de Comission, de Bancje centrâl (BCE) e dal Consei European e la incarghe di Alt rapresentant pe politiche cul forest. Se in ocasion des elezions europeanis, davueltis dai 23 ai 26 di Mai, e in particolâr daûr dai risultâts saltâts fûr des urnis, al jere just marcâ che chê che si pensave che e fos une grande “onde nere” di vôts a pro dai partîts nazionaliscj, xenofobis e antieuropeiscj no jere stade tâl e che impen tra i vincidôrs a jerin candidâts e fuarcis politichis che a fasevin indenant une vision di Europe plui dinamiche, plui progressiste e plui europeiste, cumò al tocje dî che jenfri Bruxelles e Strasburc lis istituzions si movin simpri daûr di chê logjiche che za timp indaûr o vevin batiât “euroconformiste”.
La sielte de todescje Ursula von der Leyen (Partît popolâr, CDU) pe sente che dal 2014 e je stade chê di Claude Juncker, de francese Christine Lagarde (che pal moment e je ancjemò a cjâf dal Font Monetari Internazionâl, cence dismenteâ il so passât intal partît neogolist dal UMP) tal puest di Mario Draghi, dal ex premier de Belgjiche Charles Michel (liberâl) pe presidence dal Consei European e dal socialist catalan (a fuart spagnolist e antiindipendentist) Josep Borrell tal puest fin cumò ocupât de taliane Federica Mogherini a son stadis fatis daûr dal plui classic “metodi intergovernatîf”. Plui di cualchidun al à comentât cheste dinamiche tant che il gnûf sucès dal “as francotodesc”, marcât dal protagonisim di Angela Merkel e di Emmanuel Macron e dai cuindis minûts di celebritât – par dîle cun Andy Wharol – dal premier spagnûl Pedro Sanchez, che in cheste ocasion al à interpretât il rûl che par solit ur tocjave ai rapresentants dal Stât talian. La intese prioritarie jenfri Berlin e Parîs e conferme il fat che la UE e à une fonde intergovernative e che chest so caratar, che si podarès definîlu tant che “ontologjic”, al è simpri plui fuart.
Tal moment che o scrivìn chestis riis no savìn ancjemò se lis designazions fatis a cjataran pardabon il consens dal Parlament European, che magari cussì no al mostre ancje chel la nature intergovernative e clopadice de UE. Chest aspiet si à palesât ad in plen intant de scree dal gnûf Parlament. In tancj di lôr, in chê ocasion, si àn scjandolâts par vie de contestazion dal imni european fate dai eurodeputâts britanics dal Brexit Party. In realtât al è alc altri che al varès di fâ vignî i sgrisui a cui che i ten ae Europe, ae unitât europeane e ae democrazie. A son lis trê sentis vueidis inte aule di Strasburc, che ur corispuindin a trê di lôr, votâts dai citadins tant che eurodeputâts, che però no ur ven permetût di jessi presints e di fâ il lôr lavôr di “rapresentants dal popul”. Il Stât spagnûl, in chest câs miscliçant azion judiziarie e azion aministrative, al va dilunc a fâi cuintri al esercizi dai dirits politics di Oriol Junqueras, il leader de Çampe Republicane di Catalogne (ERC) e za vicepresident de Generalitat, che di passe un an e mieç al è in preson preventive par vie dal referendum indipendentist dal prin di Otubar dal 2017, dal za president de Catalogne, Carles Puigdemont, in esili inte Belgjiche, e dal za ministri catalan pe salût Toni Comín. La mancjade soluzion di cheste cuistion e mostre a clâr lis contradizions e lis dificoltâts de costruzion de unitât europeane. ❚
Marco Stolfo