Dopo che intal Dicembar passât i judiçs de Cort costituzionâl slovene a àn declarât incostituzionâl l’articul che al definìs lis circoscrizions e i distrets eletorâi pes elezions politichis (daûr dai judiçs, dopo 26 agns i distrets no corispuindin plui ai criteris previodûts de leç: e je di fat masse grande la diference tra chei plui piçui e chei plui grancj), il Parlament de Slovenie al è clamât a risolvi la cuistion. Il tiermin massim par fâ lis modifichis che a coventin al è di doi agns, ma in Slovenie a àn za tacât di un pieç a lavorâ par une soluzion condividude.
Dôs lis soluzions pussibilis: ridefinî i distrets di mût che a sedin comparabii tra di lôr – daûr des primis propuestis metudis jù dal ministeri de aministrazion publiche lis diferencis tra i singui distrets eletorâi a saressin minimis, o ben dentri dal 10%, e in ognidun di chei a jentraressin plui o mancul 19 mil eletôrs – o soprimiju e introdusi lis preferencis. Si fevele in ogni câs de introduzion dal vôt di preference facoltatîf e relatîf, stant che i rapresentants dai partîts parlamentârs a àn za scartade la eventualitât di un vôt di preference assolût e obligatori.
Ae fin di Jugn, tal tierç incuintri ospitât dal president sloven Borut Pahor par provâ a cjatâ une intese largje, si sarès rivâts a un acuardi di principi sul vôt di preference, soluzion preferide de plui part dai partîts: lis listis di candidâts a saressin formadis su la base des circoscrizions e il soiâr di validitât des preferencis al podarès jessi il stes valit pes elezions europeanis (lis preferencis a son buinis dome se plui altis dal cuozient otignût dividint i vôts de liste par dôs voltis il numar dai candidâts su di chê liste).
Pal moment, però, cemût che al è vignût fûr di un altri vertiç a metât di Lui, nissune des dôs opzions e à il sucès sigurât. Il president Pahor, dopo vê consultât esperts di dirit costituzionâl, al varès miôr che il Parlament al aprovàs intant la ridefinizion dai distrets (si ‘nt discutarà intune gnove riunion a metât Setembar) in mût di sodisfâ prin pussibil la domande de Cort costituzionâl, e che al procedès intune seconde fase ae introduzion des preferencis, che par chês e covente la maiorance dai doi tierçs (60 vôts). ❚
Tjaša Gruden