Une operazion culturâl pardabon di valôr
Doi cramârs, un cjaliâr, un frari (ma isal un frari?), un persut, un bocon di libri, tantis ridadis, la simpatie di simpri, cheste volte cuinçade ancje cu la presince di un Agnul Floramo che al met dongje un altri pic ae sô za ben ricje margarite (insegnant, storic, naratôr… e cumò ancje atôr).
◆ Ce vê di plui? Di plui al è un personaç storic, un grant furlan, om di grande culture, di grande umanitât e di grande gjenerositât. Umanitât che lu puarte a rinunziâ ae cariere par amôr de fie; gjenerositât che i fâs lassâ dute la sô preziose biblioteche ae comunitât di San Denêl e, in fin dai conts, a ducj nô, che ancjemò o podìn gjoldi de sô culture.
◆ Ma trops furlans cognossino Guarnerius di Dartigne? Parcè no nus àno mai dit nuie di lui a scuele? E jere propit ore di tornâ a metilu intal puest di onôr che i spiete. Operazion riesside a plen cun chest spetacul, mangjâ libris e sfueâ persuts. Si podevial pensâ un titul plui inceôs?
◆ Fantin, Moret e Scruzzi a son une presince sigure e fuarte intal contest de culture furlane. Biel che a fasin ridi, a fasin ancje pensâ. Cheste ultime fadie e je ambientade intal Cuatricent, ma i riferiments ae atualitât no mancjin, a son almancul doi: la pandemie (a un ciert pont si metin sù lis mascarutis) e la migrazion (i trê viandants, par rivâ li de Badie di Sant Gjal in Svuizare, a àn vût a ce fâ cuntun ‘passeur’). Ducj i lôr spetacui, dilunc dai cuarante agns di ativitât, a àn savût contâ il Friûl intal so divignî. E a àn dât un biel sburt ae incressite de lenghe, tirantle fûr dai babeçs di ostarie e mostrant che si pues ridi par furlan in maniere inteligjente e no slavrade.
◆ A viodi un teatri plen di int che e assist a une serade dute par furlan, al ven di domandâsi se cheste lenghe e sedi metude propit cussì mâl. Almancul une competence passive cheste int e scuen vêle. Cuissà che no ur vegni voie di miorâ cheste competence. O ben di ripiâ a fevelâ il furlan che a vevin lassât di bande. O magari di imparâlu. ❚
