Ce che al bol tal cjamp vitivinicul regjonâl. La cuistion des Doc, a partî dal Pinot Grîs

Il non de ipotizade Doc interregjonâl dal Pinot Grîs? “Al varà di jessi un non bon di podê spaçâlu a nivel internazionâl”, al rispuint l’assessôr regjonâl ae Agriculture Cristiano Shaurli jentrant tal merit di une cuistion che tal setôr dal vin e fâs discuti in chescj timps. Dut câs, al rimarche, la partide impuartantone su chest pont e je chê peade al podê di peraule e di decision tal ambit de Doc. E cheste “e à di jessi assoludementri paritarie”, al puntualize, tra Friûl-Vignesie Julie, Venit e Trentin-Sud Tirôl, lis trê regjons che, seont un biel trop di produtôrs, a varessin di metisi insiemi par fâ nassi la gnove Doc. Une paritât che Shaurli al considere “propedeutiche e impressindibile” par fâ lâ indenant il procès, cussì come “il ricognossiment de Doc Friûl”. La paritât di vôs in cont de Doc dal Pinot Grîs, al considere, “e evitarès di fâ sucedi ce che al è stât cul Prosec, ven a stâi che un pôc ae volte il podê decisionâl al è finît tes mans di un unic teritori”.
LA PRODUZION PLUI IMPUARTANTE
Dut câs, l’assessôr al invide a meti a fûc la cuistion dentri di une suaze dulà che “o vin di lavorâ insiemi par ripuartâ il nestri Pinot Grîs a un ricognossiment slargjât di cualitât”. Cun di fat, la produzion vitivinicule plui impuartante de regjon dal pont di viste de cuantitât – a son 6 mil etars dedicâts a chest vin – e je calade un grum cussì come la percezion de sô cualitât. Al è chest il probleme che o varès gust che ducj si cjapassin a pet. Su la cure, ven a stâi la Doc, si pues discuti e o continuarai a confrontâmi cun ducj”. Si capìs, al va indevant, che passâ de etichete Igt – che a son in tancj cumò a produsi il Pinot cussì – a chê de Doc “al vûl dî, semplicementri, dissiplinaris plui sevêrs, plui garanzie di cualitât e, sore il dut, plui controi”. Tant a dî: dulà isal il probleme se ae fin une plui alte cualitât e fâs cjapâ fuarce comerciâl e di imagjin a chest vin? “O ricuardi che – al resone Shaurli – il Prosec cumò al è deventât origjin di vuadagn sigûr par cetancj di lôr, stant che in 5 agns si è passâts di 800 a 3.750 etars di vignâl di Prosec”.
LA PARTIDE DE CUALITÂT
Che po, in prospetive, la Doc e “varès di significâ ancje metisi dacuardi su lis cuotis di produzion e su la promozion”. Dal sigûr a son bielzà produzions di grant valôr in cont dal Pinot Grîs e l’assessôr lu amet, ma al evidenzie ancje che “il gno compit al è chel di pensâ a dut il setôr vitivinicul regjonâl, soredut cuant che la produzion, come in chest câs, e je dal pont di viste cuantitatîf la plui impuartante dal Friûl-Vignesie Julie”.
In struc, duncje, sul Pinot Grîs si zuie une partide par dâi “plui cualitât ae produzion cun dissiplinârs sevêrs e cun controi par ducj compagns; tornâ a dâ une nomee internazionâl a chest vin; meti prin di dut cundizions che cence di chês no si va di nissune bande: la Doc Friûl e un podê decisionâl paritari”. ❚
Antonella Lanfrit