Che mi conts de sô famee di divignince e dai siei prins agns intal so paîs di origjin.
“O soi nassude a Raviei, un piçul borc de Cjargne, intal 1934, e o soi cressude cun miei nonos, mê mari, dôs sûrs e un fradi. Midiant dai bêçs che nus mandave gno pari, che al jere lât a vivi in Sudafriche par fâ il muredôr, o vin podût vivi ben e o ai podût studiâ par deventâ mestre, frecuentant une scuele che in chei timps in pôcs a podevin permetisi.
Cuant che o jeri frute, intal 1943-44, al è sucedût un episodi che al à segnât tant la mê infanzie: Raviei al è stât invadût dai cosacs, che a àn ocupât dutis lis cjasis dal paîs. Cualchidun di lôr al è vignût a vivi ancje a cjase nestre. No nus àn mai tratât mâl, ma a volevin vê il control dal teritori e comandâ su ducj; a vevin simpri armis cun se, e jo o vevi une vore di pôre. Po dopo a son lâts vie, e doi di lôr a son tornâts timp dopo par dî graciis ae int di Raviei par cemût che ju veve tratâts cun zentilece.”
_
Cemût ise deventade mestre, e cemût sono stâts i siei prins agns di lavôr?
“A undis agns o soi lade in coleç a Glemone, dulà che o ai fat lis scuelis mediis; dopo a Udin o ai fat lis superiôrs. Intal 1956 o soi deventade mestre: l’istrutôr didatic mi à dit che e jere dibisugne di formâ une scuele pluriclasse a Pani, cjanâl che al è tra Dimpeç, Soclêf e Raviei. Jo o jeri une vore zovine e o vevi pôre a pensâ di lâ là sù a insegnâ, parcè pôcs mês prime chê localitât e jere stade savoltade dal omicidi di Antonio Zanella, un grant e siôr proprietari di terens, che ducj lu cognossevin tant che “Ors di Pani”. Dut câs no vevi sielte, duncje mi soi trasferide propit a cjase de sûr dal “Ors”, Margherita Gridel. A Pani o jeri a stâ intal edifici li che e jere la scuele: o vevi une cjamare dute par me, e la aule là che o insegnavi a nûf fruts di diviersis etâts. Ur insegnavi un pôc di dut chel che ur podeve jessi util: lei, scrivi e fâ di cont, di là de lenghe taliane, parcè che nissun di lôr al cognosseve il talian e a fevelavin dome par cjargnel. I fruts a levin e a vignivin simpri a pît, bessôi: tancj a rivavin ancje di une vore lontan e, ancje cuant che e jere la nêf alte, a jerin simpri presints. O soi restade a insegnâ là sù par trê agns.”
_
Ce saie dal omicidi dal ‘Ors di Pani’?
“La int dal paîs e contave che un fantat di cognon Lorenzini al jere inamorât de fie dal “Ors”, e che une sere al à barufât cun jê parcè che no voleve decidisi a stâ cun lui, par vie che e veve tante pôre dal pari: la barufe e je finide in omicidi e la fantate e je stade copade. Alore Lorenzini, interorît de reazion che al varès vût l’“Ors”, lu à cirût e lu à copât cuntune sclopetade. La dì dopo la polizie e à capît propit dal stât de cane de sclope ce che al jere sucedût, e ae fin il fantat al à confessât e al è restât in preson par trente agns. A cui che al leve a cjatâlu al contave simpri cheste storie.”
_
Dulà aie insegnât dopo de esperience a Pani?
“O soi lade a For Disore, dulà che o insegnavi a vincjecinc fruts di prime elementâr. Al è stât tant impegnatîf propit parcè che a jerin in tancj. Dopo jessimi maridade intal 1959, mi soi trasferide a Pordenon: ancje se no jeri ancjemò mestre di rûl, o vignivi clamade dut câs par fâ lis suplencis, e mi à clamât il proveditorât di Pordenon par informâmi che al jere un puest libar par me intal borc di Stali Gjal, inte val Tramontine. Par me al jere un grant sacrifici, parcè che al jere un puest tant lontan di dulà che o vevi la mê cjase e famee, e chê volte nol jere facil movisi come in dì di vuê: ma o ai di gnûf acetât. Cussì, dai miei fruts e à viodût la none, e jo o soi partide bessole par insegnâ par un an a dodis fruts. Dopo chel an, o ai insegnât in diviers puescj, e tra chei Andreis, dulà che o ai cognossût ancje il poete Federico Tavan.
_
Ce si visie di Federico Tavan?
Mi visi che une volte o soi lade a fevelâi parcè che mi vevin dit che lui al scriveve poesiis, e o varès volût insegnâ une biele poesie ai fruts pe Fieste de Mame, cussì i ai domandât di scrivi une. Lui mi à rispuindût “che e viodi però che jo o soi tant pessimist… Cun mê mari, no ai propit un bon rapuart…” però ae fin mi à scrit istès cheste poesie, che magari cussì no o ai pierdût tancj agns indaûr.
In chê epoche Tavan al veve sui vincjecinc agns: di chel che o ai podût viodi, al jere tant malinconic e solitari, cence compagniis di straviâsi. Magari cussì no, di chel che si sa, no si à ricjapât mai di chest brut stât emotîf e al è muart a dome sessantecuatri agns.”
__
O ai savût che jê e je imparintade cul famôs pitôr Marino Romano. Ce saie dîmi di lui?
“Marino Romano al jere gno cusin; al veve un grant talent intal piturâ murales e cuadris.
Al à inricjît il paîs di Raviei piturant sul mûr di ogni cjase un murales che al rapresentave il mistîr che al faseve ogni abitant di ogni cjase. Par esempli, là che al al jere a stâ il muredôr lui al dissegnave tal mûr un muredôr, e cussì par ducj i mistîrs: marangon, fornâr, cjaliâr, e v.i. Plui indenant al à fat murales ator par diviers paîs dal Friûl, si jere fat un non e lu clamavin un pôc dapardut. Al à fat cun di plui tant biei cuadris, che a vevin un ciert valôr, fasintsi ispirâ soredut de nature.” ❚
