Casselis di bire e cjadreis a son improibidis intai parcs di machinis

Massime in moments di vacancis, la cjace al parcament libar e pues costâ cjare, e chest no dome par vie che i parcs in Austrie – massime in localitâts di turisim – a son une vore cjârs e chei sore nuie a son cetant rârs!
◆ Une litighe pal parcament e je lade in piês devant dal stabiliment balneâr di Clanfurt. La domande che e nas e je se si puedin tignî libars i puescj che no son ocupâts.
◆ I puescj libars a son cetant bramâts, massime in chest periodi, intant de frecuentazion di rasulis e stabiliments balneârs, no par fuarce di mâr. Devant dal stabiliment di Clanfurt, doi ospits ses son petadis pal fat che une femine e veve tignût libar il parc pal so compagn, metintsi in pîts intal mieç, ma chest no i è plasût a un altri automobilist che al cirive puest e che al è jentrât di istès. La femine, ben clâr, e à scugnût spostâsi, par no jessi cjapade sot. Chest, stant al rapuart de polizie, al à saborât une barufe violente jenfri i doi umign. Un dai doi si è fat un pôc mâl e cussì si è rivâts a une denunzie.
◆ Si sa che lis agressions fisichis no si puedin acetâ e chest no si discut, ma il fat al bute là ancje une domande plui gjenerâl: isal ametût di metisi in pîts intal mieç dal puest vueit par tignîlu libar par cualchidun, par esempli pal amì che al sta rivant cu la machine?
◆ Al somee propit di no! Stant al avocat stradâl de ÖAMTC carinziane (che e corispuint ae nestre ACI), intal codiç de strade al è stabilît che i pedons no puedin inderedâ il trafic cul lôr mût di fâ. Simpri daûr dal codiç de strade, no si podarès nancje “meti une cassele di bire o une cjadree intun puest vueit par tignîlu par cualchidun altri”. Dal rest, no si pues nancje fâ cuintri fûr dal vade, par esempli spaurint chel che al ocupe cence dirit un puest, par vie che chest al marcarès un reât di prepotence, che al varès lis consecuencis proviodudis de leç. Ben si intint che nissun al è masse content di viodi ocupât, cuntune cassele o di une persone, un puest di parcament viert al public, puest che lui stes al varès voie di doprâ. Dut câs, chest nol vûl dî che lui al puedi menaçâ o obleâ cu la fuarce la persone che e ocupe il puest, par vie che in chest câs al passarès dibot de reson al tuart. ❚