Pancôrs di Udin a crodin inte mont: e a recuperin ancje lis vecjis recipis
Bogns segnâi a rivin de Cjargne, in particolâr di Rigulât, comunitât di cirche 400 animis tra i paisuts di Comelians e di For di Avoltri, indulà che ai 20 di Mai al è stât screât il for scaletarie in place Durigon. La vecje gjestion e veve sierât la ativitât ai 31 di Zenâr.
◆ “E je stade une sielte fûr des riis – al conte Fabrizio Leita – fate insiemi cui miei doi socis Raffaele Chittaro e Nadia Narducci. O crôt che dopo de pandemie e sedi tacade une inversion di tindince. Mi spieghi miôr: la int e à bisugne di un pocje plui di libertât. Mi soi informât che lis compravenditis des cjasis in mont a son cressudis. Chest a vûl dî che la int – e lu percepìn ancje intal for che o vin tal centri storic di Udin – e à bisugne di evadi, cirint di stâ il mancul pussibil tai puescj plens di int. La nestre sielte e je stade une sielte di amôr pe mont e al è stât un invistiment plui di cûr che pensât dal pont di viste economic. Jo o stoi ristruturant une cjasute là sù e mi soi fat cjapâ dentri dal paîs. Gno nono al jere di Prât, par chel che o feveli di amôr pe mont… forsit mal à trasmetût propit lui intal DNA! Duncje o ai decidût di fâ cheste sielte ponderade. O soi convint che i risultâts a saran!”
◆ La gjestion e je tes mans di Anna e Stefania: “O vin decidût – al va indenant Fabrizio – di assumi dôs personis dal puest. Ce che o vuei fâ capî a la int de Cjargne al è che no bisugne jessi remissîfs, tocje invertî la tindince: par voltâle si à di dâsi da fâ. Lu sai benon che i Cjargnei lu puedin fâ, e duncje ur vin dât a lôr il lavôr, par une cuistion di motivazion.”
◆ Un altri element impuartant al è stât il jutori de aministrazion comunâl che e à metût a disposizion i locâi e la strumentazion par podê vierzi cheste ativitât. “Cuâl comun metial a disposizion dut pûr di fâti vierzi, cun chê di no fâ murî il paîs e par dâ i servizis essenziâi pe vite dal paîs? – al dîs Fabrizio -. Mi son stâts dâts struments impuartants… O soi convint che se o fossin stâts in 30 interessâts a vierzi cheste ativitât ducj no varessin acetât.”
◆ Dongje dal pan, inte buteghe si cjatin ancje dolçs, pasticins mignons, si fasin tortis su ordenazion par ogni cerimonie. “O vin tirât fûr la vecje recipe dal strucul o strudel riguladot e ca di cualchi timp o tirarìn fûr la recipe tradizionâl dal crustul di Ludarie – al dîs Fabrizio –. O vin ancje lis crostadis: o sin daûr a studiâ par cirî di capî i ingredients origjinâi di chê che di frut mi fermavi a gustâ prime di lâ in vacance a Gjiviane. Il nestri sium al è chel di riscuvierzi i dolç tipics de Cjargne e di dâju fûr ancje inte grande distribuzion come prodot di cualitât, par rivâ ancje a creâ plui puescj di lavôr. O vin di cambiâ mentalitât e di viodi lis robis in maniere positive: cui che al à provât al è rivât insom, massime intal setôr alimentâr. Mi vegnin tal cjâf tantis aziendis che a produsin par esempli frico, grissins, marmeladis… La int e cîr e e compre prodots gjenuins fats in ambients incontaminâts. Par gno cont, i prodots de mont a son chei plui cirûts.
◆ Il for, ancje se al è viert di pôcs dîs, al à za tacât a vê un bon preseament cence nancje tante publicitât! O vendìn plui dolçs che no pan! No lu varès mai dit!
◆ Par cui che al vûl passâ a gustâ i nestris prodots, la buteghe e je vierte ducj i dîs des 07.30 aes 12.30, e la sabide ancje des 16.00 aes 19.00; vie pal Istât e restarà vierte ancje di domenie.” ❚
