Sfuei Mensîl Furlan Indipendent
Archivi de Patrie

BASTIANCONTRARIE. STORIE FURLANE AL FEMININ. Cecilia Danieli, la “Siore dal Açâl” cul lavôr tant che passion

............

Dongje de cjase di famee, logade a Cjaminet di Buri, là che Cecilia e veve spindude la sô prime etât – e jere nassude a Udin ai 22 di Jugn dal 1943 – e jere la oficine mecaniche dal nono Mario e dal pari Luigi: un lûc là che il lavôr, la buine ande, il gust di savê fâ e di volê fâ a jerin deventâts il spieli di une schirie di stimui e di sburts peâts a progjets, brevets, oparis di snait e di inzen, une vie dute furlane inmaneade su la filosofie dal bon sens e ancje su chê dal sacrifici, inte convinzion che fadie e passion, fedeltât ae peraule dade e ancje une cierte ambizion sane a podevin sposâ insiemi la soliditât dal sens pratic cu la lizerece visionarie de utopie.

Jenfri il 1949 e il 1950 il pari di Cecilia, come tancj altris furlans, si trasferìs in Argjentine, daûr dal sium di un grant progjet peât ae siderurgjie che però nol viodarà mai la lûs e al restarà cence realizazion. Purpûr ancje chê tiere cussì lontane, che par tancj di lôr e à vût il savôr amâr de migrazion e de nostalgjie, e lassarà une impronte fuarte e profonde inte anime di cheste zovine fantate di Buri, massime in chê sêt mai saceade di cognossi lis novitâts dal Mont, il plasê pal confront cu lis culturis ancje lontanis, il sium de aventure, che – al è evident – e sintive ardi e brusâ sot de piel. Par chest, forsit, une volte tornade a Udin, cjapade la maturitât tecniche al Istitût A. Zanon, e torne subit a fâ la valis e e partìs su la strade dal Mont juste par sperimentâ chel cjalâ stramp, diferent e dal sigûr inovatîf che al varès rindude uniche dute la sô biografie.

Cussì dopo vê vivude une esperience une vore fuarte intai Stâts Unîts li di une aziende agricule, e decît di tornâ ancjemò une volte a cjase sô, in Friûl, par dâi une man e un sostegn a so pari Luigi, che in chel periodi si stave impegnant a rilançâ la imprese di famee, e si specialize inte produzion di implants pe industrie siderurgjiche. Ma nol è dome un lavôr, par jê, pluitost une grande passion di vite: Cecilia in efiets e je plui che cussiente che studiâ al sedi la clâf par vuadagnâsi il travuart de inovazion. Savê di plui al vûl dî jessi vierts al cambiament, al confront, ancje ae scomesse sul avignî, che nol spavente, anzit al stice la curiositât di cambiâ par jessi miôr e diferents. Cussì, intal 1969 e discut une tesi di lauree che e fronte come teme la tutele de invenzion industriâl: cuntun anticip di almancul une ventine di agns.

Il 1976 al rapresente un an piturât di neri sot di ogni evidence: l’Orcolat che al glot il Friûl si sente suntune crisi pluitost serie che e colpìs la aziende di famee, peade ae recession globâl dal setôr siderurgjic. Cecilia e fronte la cuistion come che simpri e à fat, cul cûr e cu la inteligjence. E decît di impegnâsi intal setôr aministratîf e finanziari e inte gjestion dal personâl. Siore di une grande esperience che si jere madressude intal forest, e sarà une des primis industriâls europeanis a capî la impuartance di vê une clape manageriâl là che la esperience dai dirigjents plui anzians e scuen poiâsi ancje su lis ideis inovativis dai cerviei plui zovins, par intindisi chei che a jerin a pene jentrâts in aziende vignint fûr de Universitât, cuntune visuâl dal dut gnove, votade ae sperimentazion, al confront, ae viertidure cul Mont e ae inovazion.

Cecilia no à pôre di vierzi lis fabrichis di chê altre bande dal mûr che ancjemò in chei agns al separave la Europe ocidentâl di chê orientâl, il sisteme economic e politic capitalist di chel marxist e comunist. Cussì, cjapant sù une comission impuartante vignude propite de DDR, la Gjermanie socialiste dal Est, e rive adore a tirâ sù il destin de aziende, slargjantsi intal principi dai agns Otante ancje in Bielorussie, in chei agns republiche sovietiche. Cussì cuant che ducj chei altris a scjampin, jê e cor in direzion contrarie e e vinç la partide.

La famose prime pagjine dal Times le clame la “First Lady of Steel”, ven a stâi la prime femine dal açâl: un titul forsit ancje masse agressîf par une anime buine e zentîl come che e jere la sô. No cate dut, le conte lungje su la stime e su la considerazion che il mont de finance internazionâl al veve par jê. Cecilia in efiets e à simpri preferidis la identitât e la apartignince ae cariere, tant di refudâ l’invît a cjapâ sù une posizion apicâl in Confindustrie, a Rome, un puest che i varès dade une visibilitât e un podê straordenaris, preferint restâ a Buri, jenfri la sô int. Intal 1997 e fo premiade cul prestigjôs premi Epifanie.

Doi agns dopo, ai 17 di Jugn dal 1999, e murive inte cliniche oncologjiche di Davian. ❚

Agnul Floramo

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +