Ca di cualchi dì tancj di nô a scomençaran a strucjâsi intai centris austriacs par gjoldi dal aiar nadalin che si sint lenti sù, spassizant jenfri i marcjaduts di Nadâl. Dut câs chescj a son nome la ponte di un iceberg, un reclam pai dordei, par tirâju dongje e splumâju.
O savìn che la Austrie e à une tradizion catoliche cetant inlidrisade jenfri la int, e alore dute la dade nadaline, scomençant de prime domenie
dal Avent, e involuce ogni sît intune velete di atmosferis magjichis e maturlis.
Par chest cumò o volìn fevelâ des tradizions plui cognossudis dai nestris convicins, che cetantis lis vin impuartadis, aben che lis vin fatis deventâ nestris in mût falât.
Prin di dut o fevelìn de corone di Avent, fate cun ramaçs di peç o di dane e cuatri cjandelis: la corone verde no je nome simbul di vite e di sperance, ma la sô forme taronde (il cercli infinît, simbul di eternitât) e pant il trionf de vite su la muart, intant che lis cjandelis a son segnacul de lûs che Crist al puarte intal mont. Ogni domenie – scomençant de prime di Avent – e ven impiade une cjandele, fintremai che inte ultime domenie prime di Nadâl dutis cuatri a saran impiadis, prin anunzi dal Nadâl che al sta rivant.
Intant dal Avent lis feminis a son usadis a preparâ i biscots di Nadâl, che a son di biel augûr e che par chest a vegnin regalâts ai cognossints.
La colme des fiestis dal Invier e je par sigûr la vilie di Nadâl, che dutis lis buteghis e i uficis a sierin cence fal a misdì, par che dute la famee e podedi stâ daûr insiemi ai preparatîfs: l’arbul, cun di fat,
al ven parecjât propite ai 24 di Dicembar (no prime!) e al ven metût al puest di onôr intal mieç dal tinel (no di fûr, intal frêt). Chest moment di cunvigne familiâr al è cussì sacri che e esist la superstizion che, se un forest al tuche ae puarte, chê famee e varà un corot jentri l’an cu ven.
Une altre usance che nô no cognossìn e je chê dai Barbarazweige: inte dì di Sante Barbare (ai 4 di Dicembar) si metin adun uns cuatri ramaçs di cjariesâr e si metin inte aghe. Se a Nadâl a sflorissin (al sucêt cuasi simpri!) a saran di bon avôt par dut il gnûf an.
Intant che lis usancis nadalinis nus pandin putropis diferencis cui nestris convicins, chês de rivade dal an gnûf a àn cetante filusumie parele cun nô. Prin di dut ai nestris convicins ur plasin une vore i sclopetons! La gnot dal ultin dal an si puedin rimirâ dapardut lis luminariis dai fûcs plui stramps e nissun al sparagne (la matine dal prin dal an o ai viodût a tirâ sù i risultums dai sclopetons e jemplâ doi camions nome intal curtîl di un agriturisim austriac). Ma chest al sucêt a miezegnot. Par imbroiâ lis oris di prin si costumave di profetâ l’avignî midiant de tecniche dal Bleigießen, che al consisteve intal fondi il plomp e butâlu subit inte aghe frede par vualmâ lis figuris che si formavin intant che al caglave. Dal an passât cheste tecniche è je improibide des gnovis diretivis sui prodots chimics.
Par dâ il bon an e ven regalade un plantute di fuee di cuatri – che si spandarà par dut il zardin! -, un
spachenapis, segnacui di puartefortune, o un purcitut di marzapan, che aromai ju cjatìn in dutis lis fatis ae fin di Dicembar intai supermarcjâts austriacs, simbul di fertilitât e di benstâ.
Une ultime tradizion – ancje cheste di ispirazion catoliche – e je chê dal Sternsingen, che o cjatìn formis someantis inmò vivis in cualchi paisut de Cjargne. Un piçul trop di frutins vistûts di Trê Rês e cuntune stele a van di cjase in cjase intai prins dîs dal an, cjantant o disint sù poesiis o preieris cun chê di tirâ sù alc cun fin di beneficence. La cjase che ju ricêf e ven daspò “benedide”: sul plan disore de puarte al ven scrit, cuntun zes benedît, C + M + B cul an a pene scomençât: si che duncje chest an cu ven o viodarìn 20+C+M+B+20.
Cussì, bramant par ducj i letôrs lis buinis fiestis cun tancj purcituts, ve ca sclarît il misteri di chês stranis siglis che si viodin su dutis lis cjasis di là dal confin. ❚
Barbara Cinausero
