AUSTRIE. Gnûf plan pe scuele secondarie slovene a Viene

Barbara Kolšek, slovene di Lubiane che e vîf cu sô famee a Viene, e à la intenzion di meti in pîts il prin gjinasi sloven tal cjâf lûc austriac. «Se dut al va daûr i plans, la gnove scuele slovene e vierzarà lis sôs puartis za l’an cu ven», e dîs Kolšek.
Dopo Graz, il sloven ancje te capitâl?_ L’an passât, gjenitôrs slovens a àn lançât cun sucès un gnûf cors di lenghe slovene a Graz, soredut par chei slovens de Carinzie che si son stramudâts in Stirie par motîfs di lavôr o di studi. Cussì a puedin imparâ il sloven tant che materie complementâr te scuele superiôr ancje chei slovens di minorance di seconde o di tierce gjenerazion che no fevelin plui la lenghe.  Significativementri, un obietîf plui ambiziôs al è stât presentât de slovene Barbara Kolšek, che e vûl screâ a Viene un liceu fûr par fûr sloven.  La ex diretore de division internazionâl al liceu Bežigrad a Lubiane e vûl assisti te organizazion e in fin ancje cjapâ la direzion di chest liceu.
Imparâ dal gjinasi cec_ Esempli pe idee di meti in pîts un liceu sloven e je la scuele superiôr Komensky, rezude de minorance ceche tal tierç distret di Viene, che cumò e je za deventade une scuele multilengâl dulà che l’insegnament  si davuelç in cec, slovac e todesc. Anzit, cumò a vuelin tacâ ancje cul cravuat e cul ongjarês. Cussì ai arlêfs slovens si podarès insegnâur te lôr lenghe mari, e in inglês e todesc. Chê altre opzion e podarès jessi dome une cooperazion cu la scuele ceche: dut al dipent dal numar dai scuelârs potenziâi.
Il diretôr Vrbinc dal gjinasi sloven di Clanfurt, la uniche scuele superiôr fûr par fûr slovene in dute la Austrie, al stime che il progjet  al vedi il potenziâl par otignî un sucès,  stant che a Viene a son avonde fruts slovens. Barbara Kolšek e invide ducj i gjenitôrs che a son interessâts a partecipâ al progjet. La sole condizion e je che il frut al feveli almancul une des trê lenghis di insegnament. Tal câs che a sedin  avonde nons, si podarà tacâ cul insegnament za tal an scolastic sucessîf. ■
JANEZ ERAT