Sfuei Mensîl Furlan Indipendent
Archivi de Patrie

AUSTRIE. Glesie austriache: al è stât un câl dal numar dai disbatiâts dopo un an di crisi

............

La plui grande crisi e semee che e sedi superade. Chest an a jerin “dome” 58.603 pioris che a àn zirade la schene ae organizazion de glesie. “Dome”, parcè che il trend negatîf e pericolôs dal pont di viste dal finanziament de glesie austriache si è fermât: ven a stâi, a son il 32 % in mancul a pet dal an dal scandul, il 2010.
Daspò il scandul di abûs e di violence dentri de glesie, al è tacât un grant esodi cun 85.960 câs di jessûts, che al rapresente la cifre plui alte tal dopovuere.
Il numar dai catolics in Austrie tal 2011 al è restât in sostance stabil.
Daûr lis statistichis uficiâls publicadis de Conference episcopâl austriache, al è regjistrât tal Dicembar dal 2011 il numar totâl di 5,41 milions di catolics: pôc mancul dal 2010 (5,45 milions), in pratiche une lizere diminuizion di cirche il 0,86 %.
Fatôrs rilevants pal câl minimâl dal numar dai catolics no son dome la relazion tra chei che a àn decidût di lassâ la organizazion e chei che a son rientrâts, ma ancje il rapuart tra batisims e muarts e infin o vin ancje un inflùs simpri plui fuart de migrazion.
«La glesie e je stade buine di ricostruî la fiducie pierdude»_ In struc, si pues constatâ che il trend negatîf si è fermât, daûr la viere regule che ancje i plui grancj scandui a vegnin dismenteâts in pôc timp.
«Il declin significatîf dal numar di chei che a àn decidût di lassâ la glesie al è un segn che la glesie e je buine di rivuadagnâ la fiducie», al à dit il rapresentant de glesie Paul Wuthe ae stampe, intant de conference episcopâl, cjalant lis cifris catolichis atuâls.
Une reson a saressin «lis peraulis claris e lis azions concretis de Conference episcopâl cuintri la violence e i abûs dentri de Glesie».  A ametin però il fat che si sint ancjemò la delusion provade di un grum di membris de glesie.
Wuthe tal stes moment al met in evidence il fat che la glesie catoliche «e reste la plui grande istituzion in Austrie, e che i partegnin cirche 5,4 milions di oms e di feminis, che i stan dentri in mût volontari».
Tal mieç di une societât che e cambie intun mût une vore dinamic, la Glesie e à dimostrât di jessi ancjemò “une vore stabile”, cuntun rûl impuartant soredut in chescj timps dificii.
Simpri plui chei che no vuelin paiâ la tasse adizionâl pe Glesie_ Cun di plui, a son simpri di plui chei che no vuelin paiâ la tasse adizionâl pe Glesie che e esist in chê forme dome intai paîs di lenghe todescje. La tasse obligatorie e je stade introdusude in te forme di vuê za al principi dal Votcent in Gjermanie ma in veretât si trate di un relit de Etât di Mieç.
O sierìn cu la discussion che si è vierte dentri dal partît popolâr ÖVP tal Zenâr di chest an dulà che e je nassude la propueste di introdusi une tasse culturâl obligatorie par ducj, ancje par chei che no apartegnin a une organizazion des diviersis glesiis. Si trate di un sisteme simil a chel talian cul mecanisim dal “Vot par mil”, cul fin di garantî la conservazion dai bens  culturâi. Al moment, la introduzion di chel gjenar di tasse no semee realistiche.
Il sisteme de tasse atuâl_ La formule di base e rapresente l’1,1% dal redit imponibil, diminuît di un impuart faturât di 49 €
e sconts varis pai monoredits, pai fruts,
pai anzians, e v.i.
Lis jentradis totâls des diocesis austriachis stimadis de Glesie a a son di cirche 375 milions di Euro. In struc, il numar dai regjistrâts catolics al è in Austrie e Gjermanie sostanziâl pal finanziament de organizazion. ■
JANEZ ERAT

L'Editoriâl / Risierve di valôr

Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +

Salon Internazionâl dal Libri di Turin 2023

Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +

COROT. Nus à lassâts Sergio Salvi

Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +

Glesie Furlane / Grop amîs di pre Toni. Program dai events pal 2023

1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +