AUSTRIE. Foncs radioatîfs, l’ereditât di Chernobyl e rive intal plat

Za fa pôcs dîs o ai vût cetant gust di jessi presinte ae presentazion di un grues libri sui foncs, metût adun une vore ben, di Julian Ferisin, di Çarvignan. E je stade une cjacarade che mi à spalancât i voi suntun mont che no cognossevi, un mont che mi à someât cetant pericolôs.
◆ Si che duncje, al capite just just ce che si lei vuê sui cuotidians austriacs nazionâi e locâi, ven a stâi un articul sui foncs, che – stant la stagjon e lis ploiis che no son lontanis – ca di cualchi dì a deventaran golosets di mostrâ tant che trofeus.
◆ O vin cualchi dubi però che e sedi une biele robe che chescj trofeus a sedin tant bramâts. Al somee cun di fat che a 35 agns dal montafin di Chernobyl, il teren di tancj puescj de Austrie, massime a bonât, al sedi inmò contaminât tant che sul imprin.
◆ Cuant che intal Avrîl dal 1986 e sclopà la centrâl, nissun si incjolè di trop grande che e fos la disgracie e des sôs consecuencis intal avignî. In Austrie, ma ancje inaltrò, no forin cjapadis cuissà ce misuris, e dut al continuà tant che prime. Inte Austrie di jevât, il timp al restà sut e cheste e fo une fortune, stant che invezit a bonât la ploie no mancjà, e ancje tante, e alore il Cesium 137 al jentrà par ben inte tiere. Cussì cumò, tant par dî une, la organizazion ambientâl Global 2000 e à misurât il teren e i foncs – i gjaluts, che a son i plui cognossûts di chês bandis – e e à scuviert che la radioativitât e je di dodis voltis plui grande di ce che e stabilìs la UE. Chestis sostancis a son jentradis inte part plui disore dal teren, là che a vegnin tiradis sù dai foncs, che po dopo lis passin ai nemâi che ju mangjin e vie indevant. I esperts a consein a fuart di no mangjâ foncs cjapâts sù in chescj lûcs, e l’ufici federâl pal ambient al à une mape a colôrs, dal vert al ros scûr, che e mostre lis areis buinis e chês contaminadis.
◆ Di bon che in dute la Austrie no son tantis zonis invelegnadis di brut: si cjatin soredut inte Alte Austrie (intal dulintor di Spital am Pyhrn), sù pai Taurs inte zone di Salon, o ben Salzburg, in cualchi cjanâl dal Tirôl. Invezit in tancj puescj de Carinzie, de Stirie e dal Tirôl, dal Salon e de Alte Austrie i colôrs a van dal zâl al naranç. Dome intes parts plui di jevât de Austrie si cjatin pal plui zonis verdis e chest propit pes cundizions dal timp intes zornadis dal disastri, tant che o vin za vût dit. Simpri fevelant di foncs, lis consecuencis dal ribalton di Chernobyl a son ancje inte grande butade di metai pesants, che cumò si cjatin soredut intai champignons. Par chescj motîfs, lis autoritâts a disconsein di mangjâ foncs e salvadi des areis plui invelegnadis. Ben clâr, in tancj a stuarzin il nâs, massime lis categoriis economichis che a vuadagnin su chescj gjenars, par vie che, par lôr cont, i valôrs dal Cesium a saressin lâts jù cetant.
◆ E alore? E alore e jentre salacor la politiche, par vie che tancj a a àn voie di meti la int in pevarine su la cuistion de centrâl nucleâr di Krško, che e je lontane nome 71 km dal confin: tal câs di un incident, i problemis dai foncs e dal salvadi a saressin i fastidis plui piçui!
◆ La cuistion si sta scjaldant simpri di plui, ancje par vie des gnovis ideis su la tutele dal ambient e dal clime, là che i politics a van daûr de utopie de energjie nete. Salacor no àn capît – ni lôr ni la int – che nol mudarà nuie fin cuant che dut il gjenar uman nol cambiarà stîl di vite e che nol podarà sorevivi al aument demografic continui.
◆ No stin a metisi masse in pinsîr! La Nature e cjate simpri il so ecuilibri, e salacor cheste pandemie e je nome une cerce. ❚