AUSTRIE. Fin a 12 oris di lavôr in dì. Guvier de bande dai “parons”

Cui aial bisugne di une zornade di lavôr di 12 oris? Cui podaraial lavorâ di plui un doman? E ce ur rivaraial ai lavoradôrs sore chest? La gnove propueste di leç ise un atac frontâl ai lavoradôrs o un mieç di sorevivence pai datôrs di lavôr? Si rivaraial a un siopar gjenerâl e duncje ae fin de pâs sociâl? Chestis a son lis cuistions che a fasin discuti sindicâts e politics e che za di un pôc di timp a cjapin ducj i media austriacs.
Cun di fat, il guvier austriac al à in man la cuistion ingredeade de modifiche de leç sul orari di lavôr. A chest proposit, inte ultime setemane di Jugn si à decidût di slargjâ l’orari a 11 o 12 oris in dì su base volontarie; ma chest no ur baste a chei che i fasin cuintri ae leç: a pretindin che il lavôr sore lis 320 oris ad an di straordenari al continui a restâ leât ae aprovazion dal consei di fabriche. La scanceladure dai “straordenaris speciâi” di someti a aprovazion, che ancje in dì di vuê a van fin a un massim di 460 oris ad an, al volarès dî che si podarà pretindi plui dispès di lavorâ sore il normâl, ven a stâi di rivâ des 9 aes 12 oris in dì, ancje se chest al sarà “volontari”: di fat, il singul lavoradôr al à mancul pussibilitâts di fâ cuintri o di contindi il dâ e il vê in confront al consei di fabriche. La stesse robe e sarès pes zornadis di fieste e pes domeniis, e cussì pal avignî no coventaran plui regolaments speciâi par podê lavorâ fin a un massim di 4 zornadis di fieste ad an.
Cussì no si podaran plui madressi decisions jenfri i lavoradôrs e lis lôr rapresentancis, che a vegnin savoltadis sul prudelâju, e cun di plui no saran nancje siguradis misuris justis di compens pal lavôr di plui. Chescj a son di fat i ponts plui ruspis de discussion e a àn puartât 100.000 lavoradôrs austriacs a lâ in place a Viene sabide ai 30 di Jugn.
La proteste e jere indreçade massime cuintri di doi aspiets. Di une bande, cuintri dal slungjament dal orari di lavôr massim a 12 oris, che nol sarà plui in dipendence di dibisugnis temporanis e straordenaris. Ancje se chest slungjament al sarà su fonde volontarie, si à pôre che i lavoradôrs no podaran sielzi e a saran tignûts sot scorie.
Di chê altre, lis cjamaris dal lavôr, i sindicâts e lis oposizions a protestin par vie dal fat che cu la gnove leç si sledrosin lis manieris che i lavoradôr a àn di decidi insiemi: un doman i pats aziendâi a podaran inmò jessi, ma no saran obligatoris e chest al podarà puartâ ancje a scancelâ chei che za a esistin.
Dongje di chest, i contrats coletîfs no varan plui di meti dentri regulis su la determinazion dai compens o des indenitâts.
Ai 5 di Lui stât il consei nazionâl – cuasi ae unanimitât – al à fate buine in dut la propueste, dome cu la variazion che la disposizion e jentrarà in vore bielzà dal Setembar dal 2018, impen che dal Zenâr dal 2019. E intant si fevele za di ridusi di 5 a 4 lis setemanis di feriis pai lavoradôrs, stiçant cussì altris protestis, che a fasaran deventà plui “cjalt” il clime austriac. ❚
Barbara Cinausero