ATUALITÂT – Vote furlan!

E come scuasit ogni mês di Mai o Jugn, ancje chest an a son rivadis lis elezions. E dute la Italie jù a lamentâsi parcè che lis votazions lis placin simpri te biele stagjon, cuant che la int e à voie di lâ al mâr e no di stâ a cjase a votâ.
Dome il Friûl no si lamente de sielte da la date. Prin, parcè che votâ al è un dovê e il furlan no si tire mai indaûr devant di un dovê, e se je cualchi sacrifizi di fâ, ancjemò miôr: il furlan al è nassût par chel. Secont, parcè che tant, inutil contâse, di sabide e domenie in Friûl al plûf e distès no si pues lâ al mâr. Che dopo, lis percentuâls di chestis ultimis consultazions a vedin regjistrâts numars bas, a son dome la conferme che in Friûl e je simpri plui int che e ven di difûr…
Duncje, il furlan al va a votâ. Al è ancje un mût par sintîsi util pe societât. Il probleme al je sielzi par cui votâ. Cence stâ a fâ cuistions politichis, di drete, di çampe, di centri, di devant e di daûr, cuâl podaressial jessi un sproc bon di convinci un eletôr tirât sù a polente e frico?
Tai manifescj eletorâi, dongje di chês musis che a ridin cul 50% + 1 dai dincj, si lein simpri chês stessis robis.
“Vote par Toni, un om zovin”. Zovin. Isal un vantaç in politiche jessi zovins? Isal di fidâsi di un om zovin? Il furlan lu sa: la ligrie e je dai zovins, e cu la ligrie no si mande indevant une aministrazion. Miôr cirî cualcidun altri.
“Vote par Meni, un om seri”. Un pôc banâl, no? Se Meni al è furlan, podaraial mai jessi un om lizêr? Al è come scrivi “Vote par Meni, un om cun dôs gjambis e doi braçs”. Se Meni invezit nol è furlan, al sta contant balis: dome i furlans a son int serie.
“Vote par Jacum, un om gnûf”. E di dulâ vegnial fûr chest Jacum? Di cui isial fi? Ce fasevial prime? Dulà si platavial? Parcè no isal vignût fûr prime? No jerial miôr un om che si cognosseve bielzà?
E ancje lis promessis no vadin miôr. E li no je nancje colpe dai politics: plui semplicementri, i furlans no si fidin da lis promessis e da lis peraulis, a crodin dome ai fats. E fin a tant che nissun al inventarà un mût par meti un fat parsore di un manifest, nol esistarà mai un manifest che al rivi a convinci un furlan. No: nancje chei che a prometin plui lavôr par ducj. Il furlan di lavôr a ‘nd à bielzà avonde, e se ancje al ves un dîs minûts in dì cence nuie di fâ e al ves voie di cjatâsi alc altri ce fâ, vuelistu propite gjavâi il gust di cirîsal di bessôl?
Bete di Spere