ATUALITÂT – Te Glesie Mari par tornâ aes nestris lidrîs

Ancje se aromai a son sù par jù 40 agns che si cjatisi te Glesie Mari di Aquilee pal avôt dai Ss. Ermacure e Fortunât, protetôrs dal Friûl, ogni volte e je une grande emozion. Chest an ancjemò plui grande par vie dal fat che o sin simpri di plui.
Al è un segn che al merte di jessi ricuardât in cheste ultime celebrazion, la int in pîts a scoltâ la messe cun grande atenzion, a seguî i cjants, che chest an a son stâts eseguîts dal côr “Vôs di Vilegnove”, direzût di pre Roman Michelot e che il mês passât al è stât a cjantâ te basiliche di S. Pieri a Rome.
O TACHÌN A SEDI IN TANCJ_ I agns indaûr si viodevin tancj curiôs, che si fermavin jù pe celebrazion plui par câs che par seguî cun convinzion la messe; invezit chest an e jere pardabon tante int, vignude di pueste propit par chel. No podìn duncje fâ di mancul di crodi che si sta creant une cussience condividude di tancj di lôr, che si sintin simpri plui part di chê identitât che la zornade de celebrazion, ma no dome, e sta cirint di pandi tra i furlans.
E no podeve jessi di mancul in chest 2011, che al à viodût la leture continuade de Bibie par furlan dai 3 ai 9 di Avrîl te glesie de Puritât a Udin, tirant dongje, come che al à ricuardât il president de Arlef Lorenzo Zanon, plui di 1300 furlans par un event che al segne une tape fondamentâl te storie de nestre Patrie. Si viôt che ben a planc lis robis, fatis ben e  cun costance, a san puartâ tal cûr de int chê sensibilitât che, magari cussì no, ur ven sbeleade e scombatude ogni dì. La int, al è pôc ce fevelâ, si sta rindint cont che chescj a son aveniments impuartants, no dome par cui che al crôt, ma ancje par cui che al vûl tornâ a scuvierzi lis sôs lidrîs storichis, culturâls e religjosis, come che al à vût ben dit il president de provincie Pieri Fontanini tal so salût in ocasion dal ghiringhel che si è tignût dopo de messe, come ogni an, li dal ristorant “Ai Patriarchi”.
IL FAT_ Al sarà forsit par chel, par cheste “rinassite culturâl” dai furlans, o olsi a dî, che si verifichin cierts episodis intrigôs, come chel avignût fûr de glesie pôc prime dal inizi de messe: la bandiere de Patrie, che tal so messaç e puartave scrit “i furlans a vuelin preâ te lôr lenghe” e veve di jessi a ducj i coscj tirade vie, “par no fastidiâ il bonsignôr”, al è stât spiegât…
Dut câs la bandiere e je restade li dut il timp, come che e reste ferme la nestre volontât di scombati par podê vê, biadelore, il messâl par furlan che o sin inmò in spiete de aprovazion de bande de Cei.
I PROTAGONISCJ_ A celebrâ la funzion al jere, adun cui predis di Glesie Furlane, il vicjari gjenerâl de diocesi di Concuardie – Pordenon bons. Basili Danelon che, une vore preseât, al à fevelât e let par furlan ancje se nol è di marilenghe furlane. Te sô omelie, cheste sì par talian, al à ricuardât cualis che a son lis motivazions che a puartin i pelegrins a incuintrâsi ogni an a Aquilee e, citant pre Antoni Beline, al à afermât che il motîf prin al è propit chel de riscuvierte des nestris lidrîs, tornant ta chê glesie che nus à gjenerât come popul par cjapâ in man la ereditât de nestre fede cristiane.
Po dopo, al à continuât bons. Danelon, no vin di contentâsi de traduzion de Bibie par furlan, ma o vin di pandile ancje aes gnovis gjenerazions, tignint cont, rinfuarçant e vivint l’impegn viers i nestris Sants.
Venusia Dominici