ATUALITÂT – SUNS, la fuarce des lenghis minoritariis

Devant di un Teatri Palamostre plen, Lino Straulino al vinç «Suns», la semifinâl dal Liet festival davuelte a Udin cul sosten de ARLeF. Insiemit a Straulino, al podarà partecipâ a la finâl dal Liet International, il festival des lenghis minoritariis d’Europe, il grup Dr Dreer & CRC Posse.
Cheste prime edizion di Suns – che si è davuelte sabide ai 12 di Setembar – e à savût cjapâ dentri e strissinâ la platee par mieç de colorade babêl des lenghis mancul pandudis, presintis sul teritori talian e dal arc alpin.
VINCIDÔRS E PROTAGONISCJ_ Come che si diseve, Lino Straulino, cuntune esibizion sflandorose, al à vinçût il premi de jurie grazie a une esecuzion dome par ghitare e vôs de sô “Doman”, creant in sale une concentrazion e un pathos in stât di convinci ae unanimitât la jurie internazionâl, cun a cjâf il frison Onno Falkena, responsabil dal Liet International.
Dongje a Straulino il grup hip hop sart Dr Dreer & CRC Posse al è rivât al secont puest, valit par partecipâ ae fase finâl dal Liet International, concuistant il premi dal public dât de some dai vôts ricevûts dal public in sale, e di chel in scolte su Internet e su lis frecuencis di Radio Onde Furlane.
Chei altris partecipants no son stâts mancul brâfs: prins su ducj i catalans di Alghero Chichimeca, che a son rivâts al secont puest in dutis i dôs lis classifichis. E plâs ancje la zovine Ursina Giger (dal cjanton svuizar dai grisons) cul so rock di atmosfere. Tant interessant e ancjetant virtuosistic il Rom vienês Harri Stojka. l ladins Encresciadum de Val di Fasse a àn regalât al public un mix une vore fin di Jazz e e bossanova. Fuarte e incisive la esibizion dal grup arbëreshë Peppa Marriti Band. Une garanzie i furlans R.Esistence in Dub, insiemit cul ospit sart dr Boost.
L’EVENT TAL EVENT_ Ma l’event plui spietât de serade e je stade la esibizion dai Mitili FLK di gnûf insiemit dopo dîs agns te formazion origjinâl. I Mitili a àn regalât al public une serie di tocs che a àn cjapât e emozionât la int in sale, gjavâts fûr di «Colors» (il lôr disc plui famôs), eseguîts cu la stesse poetiche energjie che tai prins agns novante e fo in stât di segnâ la strade par ducj i grups musicâi che ancjemò vuê a messedin lenghe furlane e rock.
La fieste e je lade indevant tal foilleur dal teatri, li che i grups invidâts si son podûts messedâ e sunâ intune esuberante improvisazion interetniche.
Un grant sucès, duncje, ancje in gracie dal coordenament artistic dal event par cure di Leo Virgili, Valter Colle, Paolo Cantarutti e i presentadôrs Gigi Patruno e Mojra Bearzot.
Redazion