ATUALITÂT. Sud Tirôl e Trentin: tes provinciâls confermâts Durnwalder e Dellai

LA URNE A BOLZAN_In provincie di Bolzan la SVP (Südtiroler Volkspartei) e à vût la maiorance dai conseîrs elets, ven a dî 18 su 35, ma e à pierdût la maiorance assolude dai vôts, passant dal 55,6% dal 2003 al 48,1% di cumò. Il so candidât president, Luis Durnwalder, in carghe bielzà dal 1989, al larà cussì indenant a guviernâ inmò par une legjislature. La plui part dai vôts pierdûts de SVP a son passâts al partît de diestre sudtirolese Die Freiheitlichen (14,3% des preferencis) che si ricjate cun 5 conseîrs a front dai 2 che al veve otignût intal 2003. Il PdL, cul so 8,3% di vôts e cun 3 conseîrs, al è il prin tra i partîts talians. Cun doi elets parom si cjatin po il PD (6% dai vôts), i Verts – Listis Civichis (5,8%), e la Süd-Tiroler Freiheit (4,9%). Par completâ il cuadri dai elets si à, cuntun conseîr ognidun, la Union für Südtirol (2,3%), la Leghe Nord (2,1%) e Unitalia (1,9%), coalizion de estreme diestre taliane.
In Provincie di Bolzan e coreve ancje une liste ladine, ven a dî Ladins Dolomites, che no je lade plui innà dal 1,1% dai vôts e no à duncje rivât a jentrâ in Consei provinciâl. Dut câs, intes valadis ladinis e je rivade cuasi pardut disore dal 15%, cuntune ponte dal 27,6% a S. Martin.
LA URNE A TRENT_In Trentin, cun pôc mancul dal 57% des preferencis, al è stât confermât il president in scjadince Lorenzo Dellai (centri çampe). Il so aversari principâl, Sergio Divina (centri diestre), si è fermât invezit al 36,5% dai vôts. Di chei altris cuatri candidâts presidents, l’unic che al à passât il 2% al è stât Nerio Giovanazzi, che al veve la poie di dôs listis civichis. Dongje di lôr trê, in Consei, o cjatìn 8 conseîrs dal PD, 6 de UpT, 3 dal Partît Autonomist Trentin Tirolês, e un parom dai Verts, de liste Di Pietro e de Union Autonomiste Ladine (ducj de coalizion di centri çampe), e po 6 conseîrs de Leghe Nord, 5 dal PdL e un de liste civiche Divina (pal centri diestre). Rispiet aes elezions dal 2003 il centri diestre al cres un pôc, massime pal contribût de Leghe Nord (passade dal 6,12% al 14,07%), ma cence meti in discussion la presidence di Dellai.
Tra lis confermis di chestis elezions o vin chê di Luigi Chiocchetti, conseîr de Union Autonomiste Ladine. Chest colp, contrari dal 2003, a jerin dôs lis listis ladinis che si confrontavin: cun di fat, in plui de UAL (part de aleance di centri çampe) e jere ancje la liste Fassa, leade al centri diestre. La prime e à cjapât l’1,17% dai vôts e la seconde il 0,61%. Dentri de circoscrizion ladine, dut câs, i lôr risultâts a mostrin dute une altre dimension: 54,03% pe UAL e 26,63% par Fassa.
CARLI PUP