ATUALITÂT – Puzzle emigrazion

Il pont su lis fiestis di Avost de diaspore
L’Istât furlan al è daûr a finî, cussì come lis vacancis di miârs di emigrants che tai trê mês cjalts a àn gust di tornâ in Patrie par passâ cun amîs e parincj lis lôr feriis. Simpri di mancul, in Setembar, lis targhis francesis, belgjichis, svuizaris e lussemburghesis, personalizadis cu la acuile furlane, ator pes nestris stradis e simpri plui chês rumenis e polachis, che a mostrin cemût che ancje pai tancj imigrâts e je rivade la ore di tornâ a vore.
No son mancjadis tal mês di Avost, cuasi in ogni paîs, lis “Feste degli Emigranti”, e i grancj raduns organizâts dai Ents e des  Associazions de Emigrazion.
Sacîl al à dât acet ai trê dîs de E.F.A.S.C.E. (Ent Furlan Assistence Sociâl e Culturâl Emigrants): pôc furlan “istituzionâl”, ma tancj zovins che a rivin dal Nord e dal Sud Americhe, impegnâts a comparâ il Friûl contât dai lôr nonos cun chel viodût e vivût in maniere direte. La sfuarçadure de “pordenonesitât” e cole fevelant cui emigrants, e par fortune ancje tai discors des “autoritâts” no son mancjâts riferiments al Friûl e ai furlans tal mont.
Spilimberc al à dât acet al “Ente Friuli nel Mondo”. Tant furlan tai intervents, atmosfere conviviâl, rilassade e mancul polemiche a pet dai agns passâts. Pôcs zovins purtrop, a Spilimberc, ancje se come a Sacîl, i riferiments ae gnove emigrazion cu la “valîs eletroniche” e ae “fughe dai çurviei” a son stâts continuis.
Dai emigrants sintûts in dutis dôs lis “placis”, al rive l’auspici che cheste gnove diaspore – che e à lassade te cantine la valîs di carton dai nonos par viazâ cun chê di plastiche (la piel, îr come vuê e je risiervade a pôcs di lôr) – si svicini ai circui furlans tal Mont e insieme cui zovins dissendents e sburti e e prudeli la lenghe, i cumierçs, la culture e la solidarietât furlane.
Daniele Martina