ATUALITÂT – Propuestis e provocazions

L’intervent di Mauro Tosoni sul numar passât in cheste rubriche al cole pardabon just: forsit propit lui al jere la persone plui indicade par sierâ, almancul pal moment, la schirie di intervents che o vin publicât.
Par doi motîfs: il prin, pal fat che nol è dentri di nissun grup organizât di chei che si declarin automiscj, furlaniscj e vie indenant, cence lâ daûr tant ai “-iscj”. In sumis, al à simpri combatût la bataie pal Friûl ma cence jessi in cualchi organizazion.
Di bessole no je une medaie ma nus à dade, e chest a è il secont motîf, la ocasion par rifleti su chel che al jere stât scrit prime, di chei che invezit une sielte di militance le àn fate.
Che al sedi clâr, viodût che cualchi critiche le vin ricevude pe decison di publicâ cheste serie di intervents: e je stade la redazion a domandâ i articui, lassant ai autôrs la plui complete libertât. O vin savût duncje ce che a pensin vuê dal Friûl e dal autonomisim, par ordin: Il Moviment Friûl, il Front Furlan, Identitât e Inovazion, e il Comitât pe autonomie e il rilanç dal Friûl.
L’intervent di Toson nus puarte plui indenant. Al bute un biel clap tal dibatit: «E se l’autonomisim, almancul tant che lu intindevin tai agns ’60, ae fonde des rivendicazions pe Universitât al fos in cualchi maniere realizât?».
E je une provocazion, ma di chês justis. Nus oblee a pensâi parsore e a confrontâsi cul presint e cu la modernitât dal pinsîr “minoritari”.
Mauro al vierç ancje un altri cjapitul cul riferiment aes clapis, ai grups culturâi, a la int che e lavore sul versant dal Friûl e dal so doman. Toson al sburte par un moment di unitât di dutis lis fuarcis. Nol è tant facil, lu savìn ducj, e o savìn – ognidun par cont nestri – ancje il parcè.
Di chê altre bande, nus somee che al sarès un pecjât no doprâ la esperience di chestis pagjinis di confront par slargjâlu ancje fûr dal gjornâl, metint adun chei che a àn scrit i articui. O sin daûr a lavorâ par chest confront in public. Cjatâsi al fâs simpri ben.
REDAZION