Cjalant lis manifestazions di place dai ultins agns, scomençant di chê di cualchi an fa cuintri il cementifici di Tor di Zuin fin a rivâ a che plui resinte cuintri l’eletrodot di Paluce, si disarès che in dì di vuê e esist ancjemò une cussience autonomistiche. Pluitost podìno dî la stesse robe a proposit di une rapresentance politiche autonomiste?
E MANCJE UNE RAPRESENTANCE AUTONOMISTE_ Za il fat che si poni chest interogatîf al è emblematic. Pretendents a chest rûl a ’ndi è stâts tancj e trops ancjemò o ’nd varìn di viodi, soredut cuant che si svicinarà cualchi grande scjadince eletorâl, là che al fâs comut esponi la bandiere furlane dome par lâ a ocupâ cualchi puest ben retribuît.
Il probleme al è propit chest: di cuant che il Moviment Friûl si è esaurît daûr barufis e ricors eletorâi, il so spazi tal imagjinari coletîf al è stât cjapât sù de struture fuarte de Leghe Nord (Visentin, Fontanin, Zorat, Cecot e altris a rivavin propit dal MF) e di dute une serie di personaçs improvisâts che a àn simiotât lis vecjis bataiis de autonomie furlane dome par lâ a sentâsi parsore di un bon stipendi.
Il fat al è chest: une gnove rapresentance autonomiste in dì di vuê si cjate la strade sbarade di une bande di un grant malintindiment che al è costituît propit de Leghe, e di che altre bande dal concet stes di autonomie che al ven scambiât dome tant che une semplice sostituzion tra la classe politiche parassitarie romane, milanese o palermitane cuntune altre classe dirigjente ancjetant false e parassitarie ma furlane. Fin che no si salte fûr di chescj malintindiments no saran prospetivis.
LA STRADE DI CJAPÂ_ Se e je vere che lis condizions sociâls che a àn dât sucès al MF no son plui compagnis di chê volte, al è ancjetant vêr che i timps e lis esigjencis de int si son evolûts. Vuê no si trate plui di emigrazion di masse, di universitât, di servitûts militârs. Cumò l’autonomisim furlan al à di sei in stât di interpretâ e di dâ rispuestis ai disasis dai furlans, peâts ae ocupazion precarie, ae lavoranzie sotcualificade, al stamp bas de formazion scolastiche, aes gnovis servitûts des infrastruturis (eletrodots, metanodots, oleodots, TAV, stradis a paiament, privatizazion des aghis, centrâl nucleâr…) che a ocupin la nestre tiere cence lassâ nuie ai residents, al nivel esorbitant di tassazion dal stât che al deprim la economie, fin ae straçarie de politiche ancje locâl.
Al covente inalore cjalâ indenant a chestis sfidis e cirî metodis e messaçs in stât di tirâ dongje energjiis, gnovis e vecjis, cul fin di frontâ une bataie forsit ancjemò plui dificile rispiet a dome 20 agns indaûr. Vuê si cjatìn te condizion di scugnî scombati cuintri un sisteme di informazion massîf controlât di pôcs e grues potentâts economics e cuintri lis risorsis infinidis dai partîts che a doprin i bêçs des tassis dai furlans par fâ sorevivi lis lôr struturis fatis di clients e parassîts che a vegnin doprâts par pleâ i furlans aes lôr decisions e aes lôr conveniencis.
Mai tant che cumò i bêçs gjavâts fûr a fuarce des sachetis dai furlans a vegnin trasformâts in contribûts publics (ancje chei pe tutele des minorancis) che a vegnin doprâts par stravolzi lis comunitâts e indurmidî lis cussiencis. Se no ven fûr une reazion a cheste redistribuzion viziose dal redit, tal zîr di dîs agns i valôrs di fonde de coesion sociâl de furlanie si cjataran savoltâts intune degradazion compagne a chê dal rest de Italie.
Dut chest al impon un grant sfuarç di ideis, mieçs, oms e risorsis economichis se si vûl tornâ a meti in corse une realtât teritoriâl in grât di rapresentâ il Friûl e di fâlu strafuî de sô inedie. Un sfuarç seri, che nol à di prestâsi a smiris personâls, torneconts, strumentalizazions o inschiriaments di part.
Front Furlan si è dât adun za cuatri agns indaûr, lontan di elezions, cirint di costruî prin di dut une struture di informazion e di tirâ dongje sempliçs citadins, piçui imprenditôrs, libars professioniscj interessâts a costruî un anticuarp pe societât e une forme di resistence civîl.
INDIPENDENCE_ O sin rivâts ae convinzion che le peraule “autonomie” aromai e je un concet ruvinât, là che la int lu viôt associât a circui esclusîfs e lu sint tant che “limuesine” pluitost che “rivendicazion”.
Par chel, nô dal Front Furlan o vin miôr cjacarâ di un concet plui net che al è chel de indipendence, che no si preste a manipolazions o compromès. Il sproc al è «no esist indipendence politiche cence indipendence economiche». E chest al passe prin tal costruî la indipendence tal cjâf dai furlans: indipendence dai partîts politics talians, indipendence des ideologjiis, indipendence culturâl de Italie e di Triest… e za chi al è tant ce fâ.
Une volte al leve di mode il “di bessôi” ma vuê la prospetive e à di jessi une altre. Di bessôi no si rive di nissune bande. Al covente sei inclusîfs, no esclusîfs, slargjâsi ae partecipazion, ai contribûts di ducj. Al covente strenzi aleancis dentri e fûr dal Friûl, cun cui che al crôt in chel che o vin dite prin e che nol è disponibil a svendisi dome par une cjadree.
Federico SimeoNi, Puartevôs Dal Front Furlan
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +