ATUALITÂT – Mostre dal Cine 2011

Vincjedôs produzions tra luncs e curtmetraçs, cines di finzion e documentaris rivâts di tancj paîs (Catalogne, Paîs Basc, Galizie, Frisie, Sardegne, de Comunitât Nenets) e clarementri dal Friûl, a son i protagoniscj de seconde edizion de “Mostre dal Cine – Festival dal Cine European intes lenghis mancul pandudis”. L’event al è stât inmaneât dal CEC (Centri Espressions Cinematografichis) di Udin, e finanziât de ARLeF (Agjenzie Regjonâl pe Lenghe Furlane), de Provincie e dal Comun di Udin, e al à vût il patrocini de Universitât dal Friûl. Il festival, evoluzion de “Mostre dal Cine furlan”, si conferme tant che moment di confront e di cognossince, pai adets ai lavôrs ma ancje pal public, su la cinematografie intes lenghis minoritariis. L’event, che si davuelç tes salis dal cine Visionario di Udin cun tant di incuintris cun atôrs e regjiscj (presint ancje Andrea Venier cul libri Gnognowood), al è une ocasion par preseâ il nivel des produzions intes lenghis mancul pandudis e lis esperiencis fatis in Europe che a son leadis ae situazion de politiche linguistiche interne. «La rêt di contats cun regjiscj e critics che a lavorin in cheste realtât – al marche il diretôr dal festival, Fabian Rosso – nus permet di presentâ une selezion di cine di cualitât, che e fronte tantis tematichis, ma ancje di viodi i pas fats intal setôr dai cines in lenghe minoritarie. In cualchi nazion (Catalogne, Galles, Galizie) la situazion e je buine in gracie dal supuart dal servizi public che, invezit, in altris realtâts – tacant di cjase nestre – al mancje. Un vêr pecjât, dal moment che i prodots in lenghe furlane, cuant che a vegnin presentâts, a plasin un grum».
Ospit di ecezion dal Festival, la pelicule Pa negre (Pan neri) dal regjist Agustì Villaronga. Cheste produzion, dopo vê vinçût un grum di premis impuartants, e je stade nomenade ai Oscars americans tant che miôr cine forest. Pelicule un grum realiste, e conte – midiant dai voi di un frut (Andreu) e des vicendis de sô famee – la situazion sociâl di grande tension che la Catalogne rurâl e à cognossût dopo de Vuere Civîl. Presint ae proiezion dal cine (in lenghe origjinâl e, come ducj chei altris, sottitulât par furlan), l’atôr protagonist Roger Casamajor.
Ilaria Gonano