ATUALITÂT – L’agrât di Tamau

Nus capite spes di rindisi cont des ricjecis che o vin ca sù in Cjargne dome cuant che cualchidun di fûr al ven, al viôt e nus al dîs. E al è propit ce che al è sucedût cu la dotore Ingeborg Geyer, di Viene, laureade in «filologjie gjermanistiche e aglistiche» e, tra lis tantis rôbis, studiose des minorancis di lenghe todescje presintis in Europe.
UNE VITE PAL STUDI_ La Geyer e je di 30 aigns che si interesse dal «tischlbongarish», la lenghe minoritarie gjermaniche te variante che si cjacare a Tamau. Inte provincie di Udin chestis minorancis si cjatin, oltri che a Paluce, in altris cuatri comuns: Sauris, Malborghet-Valbrune, Tarvis e Pontebe. Il so interessament e il so studi a àn puartât, intal 2002, ae publicazion dal «Wörterbuch der deutschen Mundart von Tischelwang/Timau – Glossari tamauês», il dizionari indulà che si cjate il tamavuês che al ven cjacarât e scrit in dì di vuei e al cjape dentri, lant indaûr tal timp, ancje il lessic fint a fin de seconde vuere mondiâl. Intal cors dei agns la dotore Geyer e à puartât insom diviers progjets e puartât indevant un grop di iniziativis par pandi, a nivel internazionâl, la ricjece culturâl e il confront linguistic cun altris comunitâts di lenghe todescje.
COINVOLZIMENT DES ASSOCIAZIONS_ Par fâ dut chest la dotore e je rivade adore di cjapâ dentri lis associazions locâls presintis su chest teritori; e à savût duncje jentrâ inte realtât dal paîs in ponte di pîts e plan planin e à podût scomençâ a incjaminâsi inte strade de ricercje, dal studi, metint insieme la colaborazion de int di Tamau e il so savê e soredut la sô grande passion che intai agns e à dât i siei risultâts.
LA CERIMONIE_ E cussì, joibe ai 12 di Avost intune sale parochiâl di Tamau plene di int, il sindic di Paluce, avocat Elia Vezzi, e à conferît cun agrât la citadinance onorarie cun chestis peraulis: «Il Consei Comunâl di Paluce, daûr de domande des Associazions che a operin pe Comunitât di Tamau – Tischlbong (Circul Culturâl Giorgetto Unfer, Corâl Teresine Unfer, Grop Folcloristic Is guldana Pearl, Grup Folcloristic Da Jutalan) al nomene la dotore Ingeborg Geyer Citadine Onorarie dal Comun di Paluce pal decenâl contribût pal mantigniment e valorizazion de lenghe todescje di Tamau – Tischlbong».
Chê di joibe e je stade une serade impuartante, dulà che une comunitât e à volût pandi il so agrât a une persone che à dât un jutori no indifarent a tutele dal patrimoni linguistic di cheste tiere. Dal sigûr e sarà une date che i tamavuês si ricuardaran intal timp e a podaran contâ, a chei che vignaran dopo di lôr, che il «tischlbongarish» al è inmò vîf grazie ancje al lavôr de dotore Ingeborg Geyer.
Marta Vezzi