ATUALITÂT – La Vierte di Cormons

Domenie ai 24 di Mai si à davuelte a Cormons la Fieste da Vierte 2009, la biele manifestazion inmaniade de Associazion «Amîs de mont Quarine» che invide i siei ospits a fâ une cjaminade sù pe culine che e domine la citât. Il troi al scomence a pôcs metris de centrâl place 24 maggio e si slungje fin pôc sot la roche, fasint tapis in tredis rustics che, pe ocasion, a deventin lis sedis des associazions citadinis.
Chestis, intune atmosfere vivarose, a ufrissin ognidune a so mût musiche, mostris, prodots dal teritori e no mancjin nancje zûcs pe mularie.
IL PREMI_ In serade si è davuelte la premiazion de prime edizion dal Premi Leterari «Dolfo Zorzut», il grant scritôr cormonês che al fo ancje folclorist e racueidôr di contis popolârs furlanis.
Il bant al proviodeve trê sezions (poesie, narative e une sezions pai students) e che il teme pes operis, in lenghe furlane, slovene o taliane, al fos «Ambient, leterature e liendis di Cormons e des culinis dal teritori».
Il prin premi pes poesiis al è stât vinçût di dôs oparis ex aequo: «Cjase bandonade» di Egle Taverna e «Cun bocia di ridi» di Eddi Bertolussi. La jurie e à fevelât di «(…) oparis diferentis che a son buinis di vivi cun profonde emozion lis sensazions dai timps passâts, la prime metint adun sunôrs e melodiis, la seconde cun imagjinis che a nassin di une sensualitât riesside e felice».
PARITÂTS_ Un altri ex aequo ancje pe sezion narative, cul premi a «Nocturnae illusiones: la gnot di fra Lenart» di Roberto Iacovissi e a «L’osteria fuori dal tempo» di Giacomo Vit, dulà che la jurie e à sielt di premiâ «la origjinalitât dinamiche e la presince di figuris retorichis validis» pe prime, e «la sielte dal argoment, no facil, che al met in vore une vive discussion, ancje doprant la ironie» pe seconde.
IL PROSSIM_ Il prossim apontament leterari tal gurizan al sarà pe consegne dal IV Premi Leterari «Celso Macor» a Romans dal Lusinç, che si davuelzarà ai 5 di Jugn aes 20.30 intal Auditorium Galupin.
Micjêl Calligaris