ATUALITÂT – La pâs che e cjamine

Di 15 agns si ten la Via Crucis tra Pordenon e Davian. Un moment di preiere e di riflession su ce che al vûl dî vê sul nestri teritori une base come chê di Davian. Une base che si pues clamâle in tantis manieris, ma che a la fin e reste un lûc li che lis armis a rivin e a partissin e di sigûr no par costruî. Te base di Davian si fevele di une cincuantine di bombis nucleâr. Un regâl che nol ven mai metût in discussion dai politics nostrans e nancje di chei di Rome, ignorant, no dome il parcè che a son stadis pensadis, ma ancje il potenziâl pericul pe int di chenti. Ancje un svol di un F16 al fâs pensâ se si fermisi un moment. Ogni minût di chel svolâ al coste 20 mil euros. In 15 agns cheste marcje cidine e à compagnât 4 vueris, la ultime chê in Libie. La int no jere tante, massime dal Friûl, di plui dal Venit, ma distès e jere. Un segn di criticitât, parcè che une vuere no nas come une verze. Daûr di jê a son simpri une serie di ats volûts. Daûr di Gheddafi, fint îr o jerin ancje nô: i vin dât i imprescj par jessi ce che al è vuê. No metilu in cont, nol è seri. Lis animis di cheste manifestazion a son tantis associazions, da la “Ernesto Balducci” di Çuian fint ai comitâts di Pordenon e dal Venit. Al fâs pensâ viodi plui di cualchi predessut, ma nissun vescul, a part il salût in place di Poletto. Pre Giacomo Tolot, pre Pierluigi Di Piazza, pre Franco Saccavini e altris.
A son lôr che a sintin la dibisugne di metisi in discussion, in contradizion, su ce che al vûl dî metisi denant di une crôs personâl e coletive. Cun Pierluigi Di Piazza i vin fât une lungje partide di discors, intant che si cjaminave sul ôr de base, fin che i vin cjatât un troput di lôr che a jerin li prime di nô, ju clamin turiscj di vuere. Si incrosavin doi monts, anzit trê, tal moment che a son passâts cuatri F16 che a àn cuviert ogni vôs, fasint puartâ lis mans a lis orelis.
Sot di chês alis, lis trê crôs plantadis denant di chê struture di muart, intant che i F16 si slontanavin neris come çoris.
Mauro Della Schiava