ATUALITÂT – INCHIESTE Ator pai Museus dal Friûl – 2. I museus in provincie di Pordenon

La seconde tape de inchieste nus puarte tal pordenonês. Din une cucade di corse a ce che al è ator, e dopo o pontarin la atenzion su la ultime realtât screade, chê di Manià. La categorie museâl plui presinte e je chê etnografiche, cuasi di creâ une rêt (www.provincia.pordenone.it) che e ten adun: il Museu provinciâl de vite contadine «Diogene Penzi» cuntune colezion di materiâi che a partegnin ducj ae zone dal Friûl Ocidentâl e che a testemonein la civiltât contadine locâl, organizâts par setôrs lavoratîfs cui mistîrs de mont, de plane e des vals. La particolaritât e je chê di jessi un museu sparniçât sul teritori, di fat al à trê sedis: Palaç Altan a Sant Vît dal Tiliment, sede principâl. Si trate di une costruzion signorîl cun funzion di centri di gjestion de proprietât agricule de famee, testemoneât ancje di un rodul censuari dal 1470; une seconde sede si cjate li dal Coricama di Manià, cun sezions su la lavorazion dal len e dal fier; a Cjavàs, li da Palaç Polcenic-Fane e je la part su la emigrazion.
Altris dôs realtâts etnografichis a son: il Museu de Civiltât Contadine di Andreis, incentrât su la lavorazion dai scarpets, dal vues, de sedon, dal çocul, de lane e dal lat e sui  imprescj dal fari e dal boscadôr; dentri a son racueltis ancje mascaris di carnevâl e zûcs dai fruts.
Une vore interessant il Museu Cjase Clautane, a Claut, che al descrîf la vite de femine de Val Celine, che e lavorave tai cjamps, te stale e tant che vendidore dai imprescj di len che l’om al faseve vie pal unvier.
Al è ancje l’Ecomuseu Regjonâl des Dolomitis furlanis Lis Aganis, a Manià, nassût tal 2004, cuntune ufierte siore pes scuelis e tancj laboratoris (www.ecomuseolisaganis.it).
A Pordenon, ancje il Museu Civic di Art, il Museu des Siencis e il Museu Diocesan di Art Sacre.
Di segnalâ il Museu de Centrâl di Malnîs, di caratar archeologjic industriâl, li che dal 2006 si conte la storie de aventure tecnologjiche che e à trasformât il flum Celine in font energjetiche buine par iluminâ ancje Place Sant Marc a Vignesie.
ELENA ZANUSSI