ATUALITÂT – Il nucleâr lu vin za in cjase

Al è di bant fâ fente di nuie o, piês ancjemò, butâle dute in ideologjie. Si pues ancje fâ ta cheste maniere, ma cussì no si rive a cjatâ soluzions, almancul che no sedin di fonde: sì o no ae energjie nucleâr. Par ducj, par dut e par simpri.
In Friûl al è ancjemò vîf il ricuart di Cernobil. Pensait al numar dai muarts pes conseguencis dal nûl radioatîf, dopo tancj agns, no in Russie, ma chi di noaltris, massime in mont, te zone di Tarvis, tra chei de forestâl e des aziendis sanitariis, mandâts a fâ controi e rilêfs tai boscs.
No dome, la tragjedie nucleâr, le vin vude denant dai voi, su lis musis di chei frutins che a àn passât tancj istâts tai nestris comuns, ospitâts da lis fameis furlanis, par gjoldi un rai di soreli dopo tancj patiments.
Cumò ce che al è sucedût in Gjapon nus puarte di gnûf la cuistion denant, ancje se si jere riproponude cu lis sieltis dal guvier pai sîts in Italie. Si faseve il non di Monfalcon e po dopo di cualchi localitât sul Tiliment tra Spilimberc e Tisane. Dut rimandât par vie de moratorie di un an decidude a Rome stant il pussibil efiet dal Tsunami su lis elezions aministrativis. La region no si è pronunciade uficialmentri cuintri de sielte nucleâr dal guvier. Il president Tondo al à mantignût une linie strane: Sì al nucleâr, ma a chel sloven. Ce vuelial dî?
Une partecipazion de region ae central di Krsko, apont in Slovenie, ma fint cumò Lubiane e à rispundût cun cortesie, in maniere interlocutorie, ma al somee che no vedi nissune intenzion di vierzi i puartons de sô riserve energjetiche.
Pai furlans il probleme al reste: un incident te centrâl slovene (che par diviersis zornadis si è fermade par un probleme tecnic di funzionament a metât di Març, ndr), pes distancis che a son cu la nestre tiere, al vûl dî tant che vêlu in cjase. Pa la cuâl noaltris il nucleâr lu vin za di timp.
E no dome, une bombe chimiche e je simpri inescade a Tor di Zuin.
Sperìn ben… o vino di cirî struments di difese e, se pussibil, di alternative?
Dree Valcic