ATUALITÂT – I Madracs di Martignà

Ator pe Italie ju clamin “Màdracs” cul acent su la “a”, parcè che a pensin che e sedi une peraule americane. Ma lôr ju corezin simpri: «O sin Madràcs, come chei sarpints che si cjatin dispès tal ort». Un non singolâr, sigûr, ma che al à un motîf. Tal hockey su la carocele i zuiadôrs a zigzetin in sù e in jù dal cjamp, propit cui stes moviments dai madracs. Di chi, chest non e la marcje, une mace cul cjâf di un sarpint.
I “Madracs” a son la prime, e uniche, scuadre di hockey su carocele eletriche dal Friûl. Une formazion zovine, nassude cualchi mês fa e che e à debutât a Fevrâr tal campionât nazionâl. «Par cumò no sta lant tant ben – e spieghe Donata Gregoris, une des dirigjentis e mari di une atlete – ma plui che dai risultâts, nus interesse la positivitât che chest zûc al da a ducj». Sì, parcè che i components dal grup a àn patologjiis neuromuscolârs, come distrofiis, amiotrofiis e spine bifide. «Personis che tal 99% dai câs si movin dome cu la carocele eletriche», e conte Donata. Tai Madracs a ‘nd è sedi oms che feminis, dai 7 ai 39 agns. «Soredut par chei plui dispatussâts, al è impuartant vê une ativitât di fâ insieme di altre int – e dîs – ancje parcè che, di solit, no si movin di cjase se no par là a viodi un cine o a mangjâ une pize une volte ogni muart di pape». Cumò, invezit, si alenin ogni domenie tal palaçut dal sport di Martignà e a partecipin al campionât talian insieme al Modena, al Parma e al Bolzan. «Lis regulis dal zûc a son plui o mancul compagnis di chês dal hockey su glace – e precise Donata –, dome che i atletis cun plui dificoltâts e che no rivin a tignî la mace in man a podin doprâ un baston che si clame “stick” e che al è un supuart a forme di crôs che si fisse ae base de sente».
E fâ il Madrac al è dut fûr che sempliç: «Bisugne jessi svelts, atents, nol è par nuie facil. Lôr si strachin ma no viodin la ore di tornâ a zuiâ». In scuadre, par cumò, a son in 11. Ducj de provincie di Udin, fûr che un gurizan e un pordenonês.
Valentina Pagani