ATUALITÂT – Glesie furlane, glesie universâl

Che la Glesie Catoliche e abraçàs il creât intîr si lu capìs dal so non, in grêc “katholikòs”, vâl a dî  “universâl”. Te gnot fra i 7 e i 8 di Avrîl, o vin vude conferme di chest, stant che ancje la leture de Bibie par furlan e je stade mondiâl, in graciis de volontât dal Circul Alef di Colonia Caroya che al à partecipât ae manifestazion cun vot volontaris. Si è tratât di furlans di cuarte e di cuinte gjenerazion, dissendents di chei emigrants che 133 agns indaûr a àn fondade la gnove citât tai cjamps de provincie di Cordoba, in Argjentine. Luca Peresson, dal comitât tecnic sientific de ARLeF, e Claudio Roya, President dal Circul Alef Carojense, a àn organizât la leture par furlan e dute la regjistrazion audio e video in cinc glesiis significativis pai furlans di Argjentine.
ZACARIE A COLONIA CAROYA_ La sorprese pal auditori dal Oratori de Puritât di Udin e je rivade cuant che, al puest dal letorin, al è stât instalât un televisôrs dulà che e je stade trasmetude la leture transoceaniche. Il libri di Zacarie – dulà che a son evidents i riferiments ae lontanance de Patrie – al è stât protagonist de diferide. Zovine la scuadre dai letôrs: Diego Bovo, 32 agns, al à preparât i cjapitui 1-2 te Glesie “Nuestra Señora de Lourdes” a Sant Durí a Colonia Vicente Agüero; Marcos Goy di 17 agns al à let i cjapitui 3-4 te Capele “Nuestra Señora del Rosario” di Colonia Caroya; Daniel Cargnelutti (37 agns) al à interpretât i cjapitui 5-6  e Lito Carrizo (52 agns) chei numar 7 e 8, ducj i doi te Glesie “Nuestra Señora de Monserrat” a Colonia Caroya; Edgar Toso (49 agns) il cjapitul 9 e Mickaela Toso (16 agns) i cjapitui 10-11 te Capele di “Estancia Jesuítica de Caroya” a Colonia Caroya. I cjapitui 11 e 12 a son stâts lets di Fernando Visintin (29 agns), il 13 e il 14 di Ariel Crangnolini te Glesie “Nuestra Señora de Lourdes” a Sant Durí, a Colonia Vicente Agüero.
DISTANCIS SCURTADIS, ANCJE TRA GJENERAZIONS_Partecipant a cheste iniziative, i furlans di Colonia Caroya a àn dimostrât che ancje, e simpri di plui, cul jutori des gnovis tecnologjiis al è pussibil eliminâ lis distancis fisichis tra i furlans sparniçâts pal mont, par sintîsi comunitât vive e cussiente des propis lidrîs, de proprie lenghe e de proprie fede, cence retoriche
ma cun semplicitât e passion.
Un vore preseade dai furlans de diaspore e je stade la pussibilitât di scoltâ e di viodi dute la leture midiant dal streaming di Radio Spazio 103. Il divari digjitâl tra gjenerazions al è stât eliminât: i nevôts a impiavin il computer e i nonos si metevin sentâts a spiegâ i pas dal test sacri. La leture continue de Bibie e à rivât a fâ tornâ a cjatâ il spirt antîc dal fogolâr, cu lis fameis furlanis ator dal computer a scoltâ il libri sacri. Il calôr uman al rivave no dal fûc dai çocs ma dal calôr di une lenghe cui siei acents, cui siei tons e lis sôs peraulis…
Daniele Martina