Sfuei Mensîl Furlan Indipendent
Archivi de Patrie

ATUALITÂT. Gjornalisim ladin, la cunvigne

............

La Aministrazion Provinciâl di Trent inmaneant il “IV Seminari dai gjornaliscj ladins” e à decidût di continuâ la esperience positive dal an passât in Friûl, che al è stât sede dal tierç incuintri jenfri operadôrs dai media ladins. Il seminari al si è davuelt a Pozza di Fassa dai 15 ai 17 di Mai cu la descrizion des ativitâts davueltis dai Ladins tal setôr dal gjornalisim e a un aprofondiment di chestis tematichis inte prospetive europeane. Operadôrs di radio, gjiornâi e television a an fevelât de lôr esperience. Tantis lis dificoltâts che a son comuns ai trê grups linguistics di Svuizare, Friûl e Ladinie, ma lis variis esperiencis, se confrontadis, a puedin jessi di jutori. Lis comunitâts plui indevant su alc a puedin trasmeti l’esperience a chês altres. Al è mancjât te discussion il gjornalisim par internet, il gnûf media, che al à ancjemò di jessi indagât par ben.
LA VISITE DI ARGEMÌ_Vie pal seminari si è vude la visite ecezionâl di Aureli Argemì, 72 agns, figure storiche pe difese de lenghe catalane – za perseguitât di Franco – e par dutis lis lenghis minorizadis e president dal CIMEN (Centre Internacional Escarré per a les Minories Ètniques i Nacionals). In Trentin par une altre cunvigne, il professôr no si è fat scjampâ la ocasion di saludâ i gjornaliscj ladins, a testimoneance pal so amôr pes nestris lenghis. Dilunc di un incuintri informâl cul grup, Argemì al à informât che al è daûr a lavorâ par puartâ in sede Onu la “declarazion universâl dai dirits linguistics”, stant che e je la buine ocasion dal 2008 “an des lenghis”. A domandis dai gjornaliscj furlans su ce che al pense de gnove leç sul furlan cumò impugnade dal guvier talian al à vût dit: «E je une leç masse debule, no vês vût avonde coragjo. Si à di domandâ dut chel che al è just par une tutele serie. Il dirit ae lenghe e a pandile in ogni mût al è un dirit de persone: il furlan – come dutis lis lenghis – al à dirit di jessi fevelât in plen. Il stes dirit che al è pal talian, ni plui ni mancul.» Sul cantin particolarmenti discutût come chel de obligatorietât a scuele il professôr al pant une idee clare: «E à di jessi la obligatorietât: no si discut. Par esercitâ ad implen il dirit dai furlans che si diseve. Po dopo cussì ancje i talians a cognossin la lenghe che a àn dongje».
Dree Venier
_________________________________________________
Incuintri interladin ancje pai fruts
Il sgambi e il cognossisi l’un cun chel altri jenfri ladins no je dome une robe di grancj. I scuelârs des classis III di Gonârs, cui coscrits di Dael e de scuele «A. Negri» di Udin, ai 8 e ai 9 di Avrîl a son lâts in Val di Fasse par cognossi di persone i amîs che a son in contat par e-mail o par pueste graziis al progjet «in rêt» finanziât de leç 482/99 pes minorancis linguistichis. Il progjet, che si clame «Tu cemût dîstu? tu cemût fâstu?.. vino di viodisi?», al è scomençât bielzà l’an passât. La visite e stade tornade ai 22 e ai 23 di Mai, cuant che i fruts a an fieste di gnûf insiemit intal parc dal Cormôr, dongje Udin.
Redazion

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +