Sfuei Mensîl Furlan Indipendent
Archivi de Patrie

ATUALITÂT – «Felici ma furlans», une sfide al marcjât televisîf

............

Vele ca, la serie televisive che il Friûl al cirive. Il numar passât o vevin anticipât il debut in rêt e – ce sorprese! – «Felici ma Furlans» nol è dome un biel prodot pe television, ma tant altri. Prin, la cualitât e je alte, tant di permetisi une sfide: butâsi sul marcjât a cirî fonts pe produzion, publics e privâts. Secont, e je une idee fie dai zovins: un grup di professioniscj sot dai 35 agns, une vore di lôr fûr de regjon, che si son metûts in zûc pe Patrie. Chi la marilenghe no je gran une lenghe par vecjos.
Homo Furlanus 2.0_Cemût meti fûr une idee in maniere indipendente? Maraveis de rêt, «Felici ma Furlans» si è fat cognossi propit su internet, fasint il so debut sul sît www.felicimafurlans.it: plui di  cuatri mil contats in nancje doi mês. Chel che si cjate online al è dome il promo de serie, za scrite e pronte pe senegjature (6 pontadis di 30 minûts ognidune). Il trailer al promet ben: al fâs vignî indiment ciertis pontadis di «Boris» (la cognossude serie televisive produsude di Sky Italia), al è vivarôs, esilarant ma, ancjemò plui, al è fat ben. E come ducj i prodots di cualitât, al à bisugne di risorsis par jessi realizât, ma al à ancje dutis lis cjartis a puest par cjatâlis. «Par rivâ a bon puart cun dutis lis sôs potenzialitâts, il progjet al à di mobilitâ interès eterogjenis», a fasin savê i autôrs. Une ideâl promozion slargjade, insome: finanziaments publics, se a ‘nt saran, ma soredut privâts. Cumò, che si fasin indenant: a tachin i zûcs.
Felici e furlans?_ Sigûr, chest nol è il prin prodot in marilenghe pe television. Po ben, dulà ise la novitât? «Prin di dut, nol è un progjet pensât par esaurîsi tant che fenomen di passaç inte logjiche dal «ce figade», tal microcosmi des «robis furlanis», al spieghe Tommaso Pecile, ideadôr de serie insieme a Alessandro Di Pauli, «ma al vûl contâ, midiant de satire, l’homo furlanus dai nestris dîs, cence lâ a finîle tal grotesc». Il film al è dut un fâ e disfâ stereotips, come te miôr tradizion dal teatri  comic (dal teatri a vegnin i stes autôrs), compagnant il spetatôr tal percors che i personaçs a fasin, episodi dopo episodi. Dulà che si pues ricognossi il coleghe, il vicin o, cuissà, propit nô stes. Paron Serio e so fi Stîv, dut machinis e feminis, Libero, il tipic furlan salt, onest e lavoradôr, la biele segretarie, l’operari poete. E il protagonist, Gianni, sui trente agns, tornât in Friûl dopo dîs agns che al jere vie, nassût simbolichementri ai 6 di Mai dal 1976: date spartiaghis tra un prime e un dopo, tra la vecje e la gnove gjenerazion in conflit perpetui tra di lôr, tra la societât contadine e chê de television. I autôrs no escludin la esportazion fûr di confin, tant che il film al sarà sottitulât in inglês, in plui che in talian. E se nol sarà facil spiegâi al forest parcè che par furlan la peraule  «felice» non si tradûs, o parcè che «ti amo» si dîs «ti vûl ben»: dal sigûr, nô o impararìn a cognossisi un pôc miôr, ancje midiant de nestre lenghe.
Volontaris pe Patrie_Cui aial inmò voie di contâ il Friûl, la sô int e la sô lenghe? In primis i autôrs: Tommaso Pecile, 32 agns, inzegnîr di Feagne, autôr, tra l’altri, de tragjicomedie pulp «Prime che a rivin cuatri» (miôr regjie e instalazion al II festival ATF dal Teatri furlan) e Alessandro Di Pauli, di Sant Denêl, classe ’79, fresc di dotorât in Siencis teatrâls a Barcelone. Ma no son bessôi: cun lôr, une rêt di furlans – professioniscj cu lis competencis plui diviersis, ducj sot i 35 – che di plui di un an e lavore a di cheste idee. Di fat, a son 100% made in Friûl la regjie, chê di Tomas “Uolli” Marcuzzi e Ernesto Zanotti, la fotografie, il montaç e i atôrs. La plui part di lôr e vîf di un pieç fûr di regjon e, anzit, «i plui motivâts a son propit i espatriâts», al confesse Pecile, «parcè che, ae fin, ducj si insumiin di tornâ a cjase». Se e vâl la detule «nemo propheta in patria», cuissà mai che cheste serie no puedi jessi la ecezion che e conferme la regule.
Natascia Gargano

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +