ATUALITÂT – Diaspore: si rivaraial a gambiâ?

O sierìn cun Dicembar il prin an de rubriche fisse dedicade al Friûl fûr dal Friûl. Ta chescj 11 numars o vin cirût cun scletece di stiçâ il dibatit e di frontâ, cence condizionaments, la galassie complesse de emigrazion, che e va plui in là dal tradizionâl associazionisim, pontant plancut plancut a proponisi midiant de Rêt e no dome. Se ca e là no mancjin lis ocasions di incuintri e di inovazion propositive, al displâs dîlu e soredut tornâ a dîlu, che in gjenerâl la situazion e je ferme. Lassant pierdi lis solitis declarazions retorichis e nostalgjichis, cjapât at des dificoltâts (gambiament gjenerazionâl, personalisims, conflitualitâts inrusinidis, competizion regressive, e vie indevant…) pôc si môf.
Par gambiâ i vûl olsât e coragjo, par sfantâsi e po trasformâsi intun faldon butât in cualchi archivi storic, a bastin il cidin e la sotanance oportunistiche e omogjenizante.
Dal sigûr no sarìn noaltris a gambiâ il sisteme, ma no tirarìn il cûl indaûr e se o podarìn dâ un contribût al rilanç de furlanetât tal Mont, lu fasarìn. No volaressin plui scrivi e dî “dut di tornâ a scomençâ”, ma “plui puint, plui ponts e mancul sorestants”. O volaressin contribuî a fâ sù puints tra furlans, e doprâju par butâ lis rêts par comunicâ in maniere facile, cun entusiasim e trasparence, ce che al sucêt ator e ce che al à voie di vê il Friûl fûr dal Friûl. O volaressin viodi tancj ponts di incuintri furlans tal Mont, incuintrâ mancul sorestants (presidents e delegazions) ma plui feminis e oms, fantatis e fantats, judâju e jessi judâts a fâ sù une identitât furlane plui vivarore, come la nestre bandiere!
Bon Nadâl a ducj voaltris/noaltris Furlans tal Mont, in taule bessôi, in famee o cui amîs mangjait e bevêt tipic furlan, e cussì la Patrie us somearà mancul lontane parcè che in cuasi dusinte stâts dal Mont o savarês che al sarà simpri cualchidun che al brindarà, al mangjarà e al fevelarà plui o mancul come voaltris!
Daniele Martina