ATUALITÂT. «Cjape a pet la tô salût… o varìn cure par te»

“Une mamografie fate ogni doi agns al è l’esam fondamentâl par cjatâ in timp un tumôr dal pet; e covente fate ancje se si sta ben, par vie che e je buine di cjatâ alterazions une vore piçulis e passe il 90%  des feminis cuntun tumôr cjapât dal prin moment a puedin vuarî.”
Cussì al dîs il comunicât de Aziende Sanitarie 4 “Friûl di Mieç” a dutis lis feminis di 50 a 69 agns. Fintremai dal 2006, di fat, a puedin usufruî di chest esam gratis ogni doi agns, lant sù sul “camper dal screening” daûr dal invît che i rivarà a cjase. No covente impegnative dal miedi.
Se dopo de mamografie si scuen lâ indenant cui esams, la femine e ven clamade par telefono e asistide; esams e curis a son simpri dal dut a gratis.
Se te mamografie al è dut a puest lis feminis a ricevin par pueste une comunicazion scrite dal bon risultât, cu la racomandazion di cjapâ dut câs a pet la lôr salût e di tornâ a fâ l’esam mamografic sul camper dopo passâts doi agns.
Tai prins doi agns dal screening (2006-2007), 25.620 feminis a an fat l’esam e l’1% al è stât curât, in timp e di corse, par un tumôr dal pet cjatât adore cu la mamografie.
I citadins a podaran sei clamâts de Ass4 cuntune letare a cjase par atis doi esams pai tumors: lis feminis di 25 a 64 agns pal pap-test di al cuel dal utar; oms e feminis di 50 a 69 agns ogni doi agns par cirî il sanc platât tes fecis pal tumôr dal intestin colon-ret.
Redazion