ATUALITÂT – Cimiant in muse a la pôre dal forest…

Friûl, tiere di emigrazion, tiere piçule e sierade tai siei confins, tiere di int ruspiôse e marumide: ve culì i caratars dal Friûl tal imagjnari coletîf. Ma il Friûl al è ancje tiere di int che e à zirât il mont cun curiositât e gust di scuvierzi, puartant ator la sô umanitât e fasintsi volê ben pe sô scletece, cence tantis nainis.
Un esempli nus al da la figure di Pieri Savorgnan di Breçâ, nobil furlan nassût a Rome tal 1852, uficiâl de Marine francese, sbarcjât in Afriche par jemplâ il blanc des cjartis gjeografichis. Esploradôr cence armis e cuintri de sclavitût, mot de pazience e dal rispiet, Pieri al fo un om di pâs, diferent dai “conquistadores” dal timp, tant che la capitâl dal Congo, che si clame “Brazzaville” in so onôr, e je la uniche citât a vê mantignût ancjemò vuê il nom di un colonialist. Pieri al jere vuidât dal misteri e al veve pôre, une grande pôre dal diviers. E pûr a cheste pôre al à fat cuintri, no cu la violence o imponint la sô culture o refudant chei popui, ma spartint il lôr dolôr e lis lôr gjondis, cjacarant, scoltant e viodint in lôr oms come lui, cence par chest pierdi la sô identitât, ma fasintle, anzit, plui siôre tal dialoc e tal scambi di esperiencis.
E intun moment storic come il nestri, là che africans e migrants a rivin ogni dì tes nestris tieris, tucant aes nestris puartis, o vin denant dai voi un migrant che al à alc di dînus: furlan a Rome, roman in Friûl, francês di acuisizion, african par vocazion, insume un om che, denant dal forest, al à cjalât in muse la sô pôre e i à cimiât, fin a batile, crodint te umanitât plui vere che e lee dute la int dal mont.
Se, come che e diseve Catine la Percude, “e esist une muart de tiere e une muart de memorie”, te fase che o stin vivint e tal confront cui emigrants di vuê o vin di stâ atents a no colâ tal pericul di fâ murî la memorie de nestre storie di emigrazion. Pieri da Brazzaville, furlan in Afriche, nus ricuarde alore cemût che i Africans in Friûl a puedin deventâ une risorse, par vie de comun partignince umane. Dut chest, cuintri il pericul di pierdi no dome lis nestris lidrîs, ma ancje – e soredut – la semence.
Ilarie Colùs