ATUALITÂT – Chei che a fiestezin: storiis di Voleson e di Cordovât

Par fiestezâ i 3 di Avrîl, in fin dai fats, no coventin masse robis: dome la volontât e un pocje di fantasie. A Voleson cetantis personis, ancje il sindic Maurizio Bellot, a àn picjât fûr dal barcon di cjase la bandiere de Patrie. In chei dîs, tal borc medievâl e jere la fieste provinciâl des Pro Loco, cussì dute la int rivade a Voleson e à podût viodi la acuile, fâ un brindis cuntun tai di vin e magari fevelâ de storie di cheste fieste (lis fotos a documentin propit chês zornadis). Par chei che no savevin nuie, il Sportel comunâl pe lenghe furlane al veve preparât in ducj i cjantons dal paîs schedis cun scrite la storie dal 1077, cuant che a Pavie l’imperadôr Indrì IV al stabilive la nassite de Patrie dal Friûl, tant che premi ae lealtât dal Patriarcje Siart. Ancje altris paîs a àn fiestezât in cualchi maniere, e a Cordovât un frut di origjin vietnamite al à vinçût il premi pal miôr disen su la Fieste de Patrie de Provincie di Pordenon. Un biel mût par dimostrâ cemût che cheste celebrazion e vierzi al mont, no il contrari.
Davide Francescutti