Cemut che e sune la Costituzion taliane par furlan

Sessante agns di Costituzion taliane celabrâts de Societât filologjiche furlane cu la edizion in marilenghe dai 139 articui de Cjarte fondamentâl de Republiche, che e je stade presentade uficialmentri te fieste dai 2 di Jugn.
In chê zornade, di fat, il president de socie Lorenzo Pelizzo al à consegnât la “Costituzion de Republiche Taliane” ai cuatri prefets dal Friûl-Vignesie Julie, Ivo Salemme (Udin), Roberto De Lorenzo (Gurize), Elio Maria Landolfi (Pordenon) e Giovanni Balsamo (Triest), dilunc di une cerimonie uficiâl in dutis e cuatri lis citâts.
“E je stade une precise volontât de socie – a spieghin de Filologjiche – chê di voltâ la Costituzion par furlan propit in ocasion dal 60n, in sintonie cui paris de Cjarte”.
Che a dî la veretât a àn spietât agnorums, e i furlans cun lôr, par viodi ricognossude propit dal Stât talian la plene aplicazion dal art. 6 de Costituzion, dulà che si dîs:”La Republiche e tutele cun normis di pueste lis minorancis linguistichis”.
Cu la leç 482 dal ‘99, di fat, la Italie e à finalmentri ricognossût il furlan tant che minorance linguistiche storiche dal so teritori e e à dât la suaze pe sô tutele istituzionâl.
Si che duncje, la Filogijche juste cumò e à vût ducj i argoments par frontâ la traduzion de Costituzion, ricognossint il valôr che e continue a vê no cate plui di mieç secul di vite e la gjonde di podêle lei in marilenghe savint che fintremai de sô nassince e cjapave di fat la part dai furlans di biel principi, ven a stâi tai siei articui di principi.
La iniziative de Filologjiche e à vût la poie dal president de Republiche, Giorgio Napolitano (cul Alt patronât), che intun messaç al à mostrât “il sô vîf preseament pe ativitât de Societât filologjiche furlane, che di agns in ca e lavore a pro de valorizazion e de pupilance de culture furlane, cussì come che al sancît dal articul 6 de nestre Costituzion”.
Cu la consegne di une copie de “Costituzion de Republiche Taliane” ai prefets, in cualitât di rapresentants dal Stât talian, la socie e à intindût consegnâ idealmentri il test a ducj i citadins.
La Cjarte e je stade voltade par cure di Paolo Roseano, 70 pagjinis che si lis cjate alì des sedis de Filologjiche par doi euros.
Note: la iniziative di voltâ par furlan la costituzion taliane no je une idee origjinâl ni esclusive dome de Societât filologjiche furlane, ma ancje il Comun di Aquilee tal 2005 al veve vût la stesse idee.
Cemût sunie par furlan: un pâr di articui
Art. 1.
La Italie e je une Republiche democratiche, fondade sul lavôr.
…
La sovranitât e je dal popul, che le esercite intes formis e intai limits de Costituzion.
Art. 6.
La Republiche e tutele cun normis di pueste lis minorancis lenghistichis.