ATUALITÂT. Aghe e ravanel

A son stadis di pôc presentadis lis firmis pe promozion di referendum pe abolizion des leçs in materie di servizis idrics che a previodin, tra l’altri l’afidament di chescj servizis midiant gare di apalt vierte, la jentrade simpri plui fuarte di privâts te proprietât des societâts di gjestion, la remunerazion dal capitâl investît dai stes privâts, la gjestion tecniche e operative dai servizi afidade ai azioniscj privâts. I referendaris a sostegnin che chestis leçs a privatizin la aghe. I opositôrs dal referendum a rispuindin invezit che la aghe e restarà publiche.
Franceschino Barazzutti, za sindic di Cjavaç, al sclarìs intune note diviers elements che a judin a capî miôr cemût che a stan lis robis.
«Prin di dut o vin di vê clâr che la aghe no je une robe cualsisedi» al bat Barazzutti «la aghe e je un ben particolâr, insostituibil, indispensabil pe vite no dome dal om, tant particolâr e vitât di jessi un «dirit di ogni om»».
«La aghe e jentrave fin cumò sot dal dirit public e dal dirit aministratîf parcè che sedi la proprietât sedi il possès a restavin sot il control public, cuntun control midiant di un consorzi di ents publics» al precise l’ex sindic di Cjavaç, che al continue «ma tal moment che la nude proprietât publiche e ven dividude dal possès che al ven afidât al privât midiant des gnovis leçs, si vierç un gnûf senari li che i protagoniscj no son plui i ents locâi consorziâts, ma lis S.p.A. che si varan cjapade la gjestion de aghe midiant di gare».
Barazzutti al dopre une metafore clare «Al somee di viodi un ravanel, ros par di fûr e dentri blanc: formalmentri la aghe e risultarà publiche, ma te sostance, «il dentri», o sin denant de privatizazion de aghe».
Secont i referendaris, lis leçs che a volaressin abrogâ a metin il privât intun posizion di vantaç sul public par vie de debolece dal ent public stes, parcè che i privâts a saran azioniscj di maiorance de stesse societât che e gjestirà la aghe dopo di vê vint la gare di apalt, parcè che a varan in maniere concrete lis mans su lis rêts e sui implants, lant a disponi di ducj i dâts tecnics e il know-how relatîfs. «Di front di a un podê dal gjestôr cussì reâl, concret e complet su lis rêts e sui implants al è ribaltât il rapuart tra proprietari public de aghe (e di rêts e di implants) e il possessôr-gjestôr: il prin al finìs intune posizion di dipendence dal secont. Se po o considerìn ancje l’asset azionari, che al viôt il gjestôr tecnic azionist di maiorance de societât di gjestion, l’ent public al finìs incjantonât intune posizion di comparse e la proprietât publiche de aghe disvuedade di ogni contignût. In curt, di «public» e reste dome la forme, ma il contignût al è di fat privât».
(REDAZION)