ULTIME ORE_ Luca Campanotto al à dât il vie, ma cumò a rivin altris adesions ae iniziative. Ai prins di dicembar dôs denuncis cuintri «L’Espresso» e «Io Donna» a son stadis depositadis li de Procure di Tumieç di bande di Remo Brunetti.
Cui isal Luca Campanotto?
«Un zovin praticant legâl dal Foro di Udin. Vincj e vot agns e la sperance di continuâ a zirâ pai Tribunâi cence pierdi un tic di idealisim. Grant amôr par une des Costituzions (in teorie) plui avanzadis dal mont. Grant amôr pal Friûl e pal so plurilinguilisim. Chest e altri fasint une ricercje cul gno non e cognom su www.ilgiornaledelfriuli.net».
Parcè cheste denuncie?
«Fin cumò il dirit (e no dome) penâl talian al è stât doprât par limitâ lis lenghis minorizadis; cun cheste azion al sarà invocât par difindilis. O viodarìn cemût che lis Procuris de nestre Republiche a cjaparan cheste rivoluzion copernicane. La interpretazion, tal dirit, e je simpri stade dificile, massime in Italie».
Cuâi sono i prossims pas?
«O soi content di podê fâ par prin chest at di puartade storiche e di grant significât civîl, se no altri simbolic. O speri che lu fasedin ancje altris. E sarès biele une denuncie depositade in dutis lis Procuris dal Friûl (Gurize, Pordenon, Tumieç, Vignesie pal Mandament di Puart), e eventualmentri ancje in altris Procuris, stant che a son teritorialmentri competentis Milan e Rome.».
Ce si spietial di cheste denuncie?
«Il furlan al à di deventâ un teme cjalt, un teme che se tu fevelis mâl, tu riscjis di jessi denunciât. E je une cuistion di cussience, di dirits e di rispiet, no dome dal popul furlan che al fevele par furlan, ma propit di rispiet de Costituzion taliane, e di cussience dai nestris dirits».
E cumò ce pensaraial l’establishment, furlan e antifurlan?
«No vês di domandâmal a mi. Jo no soi un politic; o soi un citadin che al fevele une lenghe difarente di chê uficializade. I dirits linguistics no son volgaritâts di ostarie o amenitâts di pôcs e vecjôs un tic particolârs, ma a son part dai dirits fondamentâi de persone umane e no àn colôr politic».
Ce significât daial a la lôr tutele?
«Difindi il pluralisim linguistic al è difindi la democrazie. Atacâlu al compuarte atentâ a la fonde de Costituzion. Tertium non datur: la politiche, massime in Friûl, e pues assecondâ lis gnovis istancis linguistichis che a son daûr a disvilupâsi de societât civîl e servî a la sô funzion publiche, pe strade di une simpri plui incisive valorizazion de lenghe locâl e de sô dignitât, o pûr continuâ a insegnâ ai furlans te ce maniere che al è plui chic o moderni o util o potent o danarôs o convenient fevelâ, riscjant di vignî sdrumade vie de gnove discuvierte de nestre identitât furlane, che e cres simpri plui e che, se no cjatarà rapresentativitât te classe partitiche atuâl, le cirarà di une altre bande».
La Costituzion, une biele idee, pecjât pai atôrs politics…
«Dutis lis fuarcis politichis, a drete ma ancje a çampe (parcè che i antifurlans a son trasversâi), a varessin di difindi il furlan, e cul furlan ancje chês altris lenghis no talianis de Italie, che invezit a son stadis minorizadis dome par interès politic, tune prospetive di esclusion e di assimilazion, inmò presint e dure a murî».
Lui al met in evidence diviers limits de Italie, no dome dal pont di viste judiziari e legâl…
«Se la Italie e je pardabon un Stât democratic e pluralistic, a varessin di podê jessi tantis lis manieris di jessi citadins talians, e il furlan nol varès di jessi contradizion sbeleade e scjafoiade, ma ricjece ricognossude e valorizade; al è clâr come il soreli che se jessi talians, tal contest di un Stât che pe lenghe al sarès totalitari, al ves di significâ, in pratiche, jessi metûts di front di un «aut aut», par gno cont jo o sielzarès, cence nancje pensâi un moment, di jessi furlan. Par furtune che il Prof. Simone (Ordenari di linguistiche de Universitât di Rome 3 che intune interviste sul Venerdì di Repubblica dai 25 di Setembar dal 2009 al veve cjapade posizion a pro dal talian tant che lenghe uniche dal Stât, ndr) nol à il podê».
Ma sino sigûrs che al sedi isolât e ininfluent tai ambients che a contin?
«Stant aes lôr teoriis menghelianis, par continuâ a fevelâ par furlan, te normalitât e ancje tal public, e podê insegnâlu ai nestris fîs, o varessin prin di utignî la indipendence dal Friûl. Cjapìn at!».
Christian Romanini
Gnovis / Presentazion dal libri di Erika Adami “Feminis furlanis fuartis”
Redazion
La Patrie dal Friûl e presente il libri “Feminis furlanis fuartis”. Storiis di feminis furlanis dal dì di vuê, pôc o par nuie cognossudis, diferentis par etât, divignince, esperiencis formativis e professionâls. Lis lee la fuarce che a esprimin tal cirî di realizâsi cun tignince, tai cjamps plui svariâts. Cun braùre pes lidrîs e tal […] lei di plui +
Event / Stin dongje ae Patrie – fotos de serade
Redazion
Joibe ai 30 di Novembar al Teatro San Giorgio – Udin (Borc di Graçan) si è tignude la seconde edizion de manifestazion “Stin dongje ae Patrie” che e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +