“Storie Sbagliate”: su lis olmis di De André

Cuatri zovins artiscj a riproponin i grancj classics e altris oparis mancul cognossudis dal repertori di un dai plui grancj mestris dal cjantautorât talian: cun emozion, e in clâf personâl, Nicole, Alvise, Veronica e Luca nus cjantin lis “Storie Sbagliate” di De André.
◆ Il titul dal progjet al è di fat “Storie Sbagliate”, come lis contis intes cjançons di De André, che a àn acompagnât e che a van indenant a emozionâ dutis lis gjenerazions.
◆ Il grup al è stât fondât tal 2018, cuant che ae zovine artiste Nicole Coceancig i àn domandât di fâ une serade su De André. Nicole, che di tant e cognosseve Alvise Nodale, graciis al zîr che si jere creât ae Girada, il folk club udinês de joibe, e à scomençât cussì a cirî altris artiscj par sunâ insiemi e par tornâ a proponi la musiche dal mestri di Gjenue.
◆ Ai doi si son zontâts ancje Massimo Silverio e Veronica Urban che a àn une grande passion par De André. La prime serade, fate tal Novembar dal 2018 tal teatri di Orsarie, e à dât tante motivazion al grup, e cussì dilunc dut il 2019 a àn fat diviers concierts ator pal Friûl.
◆ Sul tacâ dal 2020 ae formazion i è stât fat un cambi, dal moment che Massimo al à vût la ocasion di scomençâ il so tour ator pe Europe e di dedicâsi dal dut ae sô musiche. Mancjant une vôs e ancje un violoncel, si è zontât Luca Boschetti che al à sunât par tant timp cun Alvise e Veronica in diviers concierts e formazions.
◆ Cun chest progjet, i artiscj a vuelin dimostrâ che ancje la zoventût in dì di vuê e presee, e scolte e e sune tocs che a podaressin someâ lontans de mode e dai guscj dai plui zovins. Come che nus contin «Viodi che la int e partecipe a cheste ‘imortalitât’ nus fâs un grant plasê e nus da il sburt par lâ indenant»
◆ L’obietîf di “Storie sbagliate” nol è chel di deventâ une cover-band, ma di fâ rangjaments diferents di chei che si puedin scoltâ tai discs, e puartâ cussì cun se la emozion che i artiscj a sintin cuant che a fasin musiche. Tai ultins trê agns, il grup al à fat tancj concierts dulà che il public al jere simpri presint e al partecipave cjantant ducj i tocs dal repertori. «Chest al vûl dî che la musiche di De André e je inmò tal cûr de int, par fortune!»
◆ Cuant che ur domandìn cuâl che al è il toc di De André che plui di ducj ur sta a cûr, nus contin: «Za il non dal progjet al da un indizi… De André al à puartât sul palc e danant dai voi di ducj storiis e emozions che a jerin incomodis. Nô o cirìn di fâ propit chest: contâ chestis storiis che istès a son ancje avonde atuâls.»
◆ Il prin video che a àn publicât al è chel de prime cjançon che a àn metût in pîts “Crêuza de Mä”, un dai tocs cjantâts di De André par gjenovês.
◆ A àn za pensât di fâ un album cun dentri la lôr vision e interpretazion dai tocs dal cjantautôr, ancje parcè che il public al continue a domandâur il disc ae fin di ogni conciert.
◆ Noaltris no viodìn la ore di podê visâus cuant che l’album di “Storie sbagliate” al sarà publicât e si augurìn di podê sintî in curt il grup di artiscj in tancj concierts ator pal Friûl e ancje in Italie. Tignît di voli la lôr pagjine Facebook (@storiesbagliate.deandre) e Instagram (https://www.instagram.com/storie.sbagliate), par jessi simpri inzornâts su dutis lis gnovis. ❚