Sfuei Mensîl Furlan Indipendent
Archivi de Patrie

ART-Â. Cence confins. Art cuintricorint e vierte al confront

............

Oresin. Scultôr. Ancje restauradôr. Ma prin di dut, sperimentadôr curiôs. Inmagât dai materiâi, des lôr potenzialitâts, di cuant che, frutat, al à scomençât a zuiâ cui metai. Giovanni Sicuro al prove, al cîr, al cree zoiis semplicis, essenziâls tes lôr formis, midiant di tecnichis antighis, tant che il smalt a fûc, ma dopradis cuntun lengaç gnûf, moderni. Parimentri, al cree sculturis di savôr classic, ma inovativis tal stes timp.
Chel che al è impuartant pal artist furlan a son la ricercjie, la origjinalitât des formis e lis cumbinazions di tecnichis e materiâi. No il presi dai metai o des pieris doprâts. «La componente preziose e à lassât il puest a chê fantastiche, ae componente interiôr», al conte Sicuro. La preziositât dal toc e dipint, cussì, dal intervent dal autôr che al comuniche un messaç, une idee, il so mût di sintî la realtât e di rapresentâle. No dipint dal aur o dai diamants, che «a àn la cussience sporcje, parcè che – al dîs – a son fîs di vueris, violence, abûs», e, par chest, «o preferìs no doprâju».
Minto al lavore fûr di logjichis comerciâls. I siei braçâi, anei, spilis a son piçulis sculturis di meti intor, li che forme e colôr a fermin un pinsîr. «O tradûs te materie chel che o vîf e o viôt». L’oresin al è une vore atent al aspiet tecnic de zoie. Tes sôs formis no je convenience, dolcece, comoditâts o taronditâts: convenzions che l’artist al refude, risulte e elements distintîfs di un stîl codificât e ricognossibil. Par Minto la zoie no je dome un ornament che al à dentri une idee decorative. E je simbul di libertât, tal moment che si sfrancje di ogni regule e classicitât, superant cualsisei confin stilistic. «Tal fâ – al marche –, tu ti rindis cont che lis robis si puedin fâ». Sicuro al impastane formis gjeometrichis, cun spicis e cjantons. Atrat dal colôr, al cumbine cuarçs, lapislazzulos o ametistis cun arint o fier. Ossits e smalts a cjapin il puest dal plan slis. E i smalts a vegnin messedâts, cuets, brusâts, di mût di otignî efiets pitorics diferents par vie che colôr e texture a mudin. A nassin contrascj fuarts dulà che la imagjinazion e cjate corispondencis te percezion sensoriâl di ognidun. La piel e tocje chei smalts, dispès dentri dai anei, dai braçâi, no fûr tant che si doprin par solit. Semplicitât, colôr e fuarce dal dissen a pandin il debit e la amirazion tai confronts di Luciano Fabro, Giorgio Celiberti e Giuseppe Zigaina.
La ricercje di libertât si capìs ancje tes sculturis, cun dut che e je mediade des ideis dal comitent. Sicuro al à fat il monument in piere plasentine dedicât ai imigrâts a Flambri; l’altâr grant de glesie di Sant Andrât dal Cormôr in cjandit marmul di Carrara che al figure un agnul. Tal domo di Valvason al è un so tabernacul in oton, açâl e plachis di arint, fat in colaborazion cui artiscj Giorgio Celiberti e Giorgio Chiarcos. E, di pocjis setemanis, te capelute dal cimitieri di Morsan di Strade, si pues viodi la «puarte di lûs»: une sculture, scuasi gotiche, in marmul blanc, fier, veri e açâl inox li che si spiele la lûs naturâl che e jentre di cuatri barconuts, che e rapresente la puarte ideâl di coniunzion tra la dimension terene e chê ultraterene. Un progjet comissionât dal circul culturâl «Le risultive» e sostignût dal Comun di Cjasteons di Strade.
Vint a clâr che «o sin sclâfs e fîs de art taliane di cumò, che nus dete il ritmi, la direzion», Sicuro al sielç di lâ cuintricorint: «Jo o vîf il gno timp – al dîs – e o cîr di lavorâ in cuintripît». Vierzintsi al confront. «O soi braurôs di jessi furlan (lidrîs che e ven fûr ancje dal sorenon, ereditât dal nono, ndr), ma, di furlan, no vuei jessi ghetizât. La culture furlane no je alc di fâsi robâ, ma di dividi cun chei altris».
Erika Adami

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +