APONTAMENT. Ricjatâsi a Aquilee

La ocasion di cjatâsi, come ogni an par fâ memorie dai Sants Ermacure e Fortunât, al puarte a meti adun uns pocjis di riflessions, di struc, di ce che si à vût fat te suaze dal grop di Glesie Furlane e di ce che si à voie di podê fâ di chi a pôc. Un moment da pît de messe par dâ sens a un avôt che al cjale ancje fûr de glesie. Par vôs di pre Tonin Cjapelar si à ricuardât la publicazion cul jutori de Provincie di Udin, da la riedizion di “Eutanasie di un Patriarcjât” di pre Toni Beline e dal stes autôr, “Rogazions”. Cun di plui, La Patrie dal Friûl e à coeditât il DVD interviste, realizât di Video Tele Carnia, fat a in ocasion da la jessude publicazion da “La fabriche dai predis” tal 2000. Il Dvd al jere stât presentât in ocasion dai 5 agns de muart di pre Antoni. Ce che al è ator di chestis publicazions e je une schirie di conferencis cun diviers esperts tignudis dulinc dal an a Vençon. In prospetive di ce che al vignarà denant, si pense a une traduzion par inglês di “Il Pastore di Aquileia” opare monumentâl di Gabriele Pelizzari che al coment e al sclarìs il significât dai mosaics de aule sud de Basiliche Mari di Aquilee. Une maniere par pandi tal mont inglês e no dome, il valôr culturâl, storic e teologjic che o vin chenti. E vignarà ristampade ancje la racuelte di cjants “Hosanna” lade esauride di un pieç e ancje doi lavôrs passâts di pre Toni: “Fortunât il popul che il Signôr al è il so Diu” e “Sul at di voltâ pagjine”.
Al è stât ancje il moment di ringraciâ ducj dal grant event finâl da Bibie, e dal fat, sperìn decisîf par dâ un sburt a la aprovazion dal Messâl roman par furlan, de istituzion de Comission pe Traduzion dai Tescj Liturgjics, indulà che al fâs part ancje pre Loris Della Pietra che al à presiedût la messe in basiliche chest an. Al è stât ricuardât ancje l’apontament seguitîf, previodût a Vençon cu la messe in memorie dal Patriarcje Bertrant la prime domenie di Avost.
LIS PERAULIS DI PRE LORIS_ Chest an pe messe pal Avôt dal Friûl, al à presiedût il trop di predis pre Loris Della Pietra che te omelie al à puartât in evidence il concet di martiri, partint dai sants Ermacure e Fortunât, come sielte dissidente di ce che al pararès normâl acetâ. Il riferiment al jere a lis logjichis dal podê, cuintriponudis a chês pandudis dal Vanzeli. Une storie che e je presinte ancje vuê e che ancje lis lidrîs de glesie di Aquilee a pandin e a son buinis di fevelâ a un popul che di simpri a cjale a chel mût di jessi glesie e che si contrapon ai modei di vuê dispès passâts da la massificazion de television, indulà che chei che si clamin reality show o fiction a àn, ta la lidrîs stesse da lôr definizion, un savoltament de realtât.
DIRETÎF DE “PATRIE DAL FRIÛL”_Juste dopo de Messe, intant che si tignive il ghiringhel di Glesie Furlane li dal ristorant “Ai Patriarchi” di Franco Mattiussi, la Clape di Culture “Patrie dal Friûl” e clamave adun il prin diretîf elet de assemblee davuelte a Vilegnove ai prins di Lui. I cinc components dal
diretîf a vevin chê di definî lis incarghis, che
par chest trieni a son: pre Roman Michelot (President) e Remo Cacitti (Vicepresident), Milvia Zuttion, Sandra Ovan e Christian Romanini (Conseîrs).
Il President riconfermât pre Roman al à ringraziât no dome il consei pe fiducie, ma ancje ducj chei che ta chescj agns, tant che components di redazion, sostignidôrs, abonâts e simpatizants, a àn dât e a continuin a dâ une man al nestri mensîl “La Patrie dal Friûl” «A son moments dificii – al à dit pre Roman – e, come che al dîs ancje il Vanzeli che o vin scoltât vuê in Basiliche, “si salvarìn dome cul tignî dûr”, cu la buine volontât di tant int che nus sta dongje e nus dâ la fuarce par continuâ a contâ il Friûl cuntun voli plui furlan e furlanist». ■
Mauro Della Schiava