Ancje pal an 2016 il Lunari di pre Toni: ideis e solidarietât in cubie

Sabide ai 7 di Novembar te glesie di Visepente al è stât presentât il lunari di pre Toni Beline, il numar nûf di cuant che nus à lassâts. La int no je mancjade e cun jê nancje lis motivazions par jessi presints. Intun unic moment, si è metude dongje la memorie di un om straordenari come pre Toni; la solidarietât che e met adun doi monts, il nestri e chel dal Benin in Afriche, cui poçs di aghe e lis scuelis fatis sù de associazion “Amîs di Udin” (midiant ancje dai lunaris di chescj agns: passe cuarante mil euros in vot agns); e infin, lis ideis che a continuin a jessi il contignût pandût di pre Toni e di Glesie Furlane in chescj agns. Il lunari pal an 2016 al fevele di misericordie, e se la peraule e podarès semeâ retoriche, al è di bant afermâ che lis peraulis di pre Toni a rivin a dâ vivarositât e concretece a chest concet cussì peât al mont de glesie e al nestri vivi. Dodis mês e dodis moments di riflession e cualchi volte di ridi, ma simpri cu la inteligjence de profonditât di cui che al sa viodi un pas plui in là.
Il lunari nol è limitât te difusion dome al nestri Friûl, ma al zire indulà che la nestre int e va a vivi, cussì o savìn che al è picjât ator pe Italie e ancje suntun mûr di Istanbul, in plui di cualchi puest in Gjapon. Forsit nus mancje la Cine, ma o crodìn che in ogni continent e sedi presinte la figure di pre Toni, lis sôs peraulis e il sô incoragjament sedi uman che culturâl, parcè che ae fin nus ripet simpri chê: restâ umans (cuntune muse), cun dignitât, fede e libertât.
I lunaris si puedin cjatâ a Visepente te edicule dal paîs, a Basilian te edicule centrâl, a Mels simpri te edicule e a Maian. Si pues ancje contatâ la nestre redazion par vê informazions in merit. ❚ ✒ Mauro Della Schiava