Al è stât un apontament impuartant chel de Fieste Regjonâl de Proprietât Coletive che si è davuelt a Cjarlins ai 28 e ai 29 di Setembar stâts. Il cûr de ‘doi dîs’ al è stât une cunvigne interessante sul teme “Une gjestion coletive pai boscs di planure” dulà che, partint di cualchi esperience positive extra-regjonâl e de situazion di cumò inte Basse furlane, si à resonât di guvier dal teritori, di gjestion des proprietâts coletivis, di rinovade tutele ma ancje di gnovis formis di valorizazion didatiche, di turisim e di pussibile cressite sociâl, culturâl e economiche. La relazion dal rapresentant di Laboratorio Muzzana e je stade chê che e à sburtât di plui e in maniere inovative su la dibisugne di meti in zûc lis risorsis e lis vocazions teritoriâls – cjapadis dentri lis proprietâts coletivis, ma no dome chestis ultimis – intun progjet di programazion e di valorizazion sorecomunâl che al rivi a dâ cualchi prospetive ancje dal pont di viste de sostignibilitât e dal disvilup economic. Biadelore! Il resonament di chescj zovins al varès di deventâ il manifest politic pal disvilup de Basse intai prossims vincj agns.
Di masse timp il nestri teritori al è daûr a frontâ une crisi dai modei produtîfs aplicâts intai ultins 20/30 agns (agriculture intensive, pôl turistic espulsîf mâr/splaze, industrie di manifaturis a bas valôr zontât) e cheste situazion, no frontade cu la decision necessarie, si è incrosade intai ultins agns cu la crisi globâl che e à prodot efiets pesants dal pont di viste ocupazionâl, economic e sociâl. La vie di jessude e sarès propit chê di individuâ une gnove e plui atuâl aministrazion teritoriâl, un gnûf pat sociâl e un gnûf model di disvilup che al partissi de valorizazion des vocazions e des ecelencis dal teritori – val a dî ambient di presi, agriculture di cualitât, turisim e acet -, acompagnât de gjestion associade dai servizis e di une planificazion strategjiche e struturâl di aree largje.
Intun teritori cussì siôr di bielecis ambientâls, di oportunitâts culturâls, di produzions enogastronomichis di cualitât, cheste e je une strade segnade: al bastarès lâi daûr cun coerence e che ognidun al fasès la sô part. Al è ancje significatîf che un stimul di cheste fate al rivi di une cunvigne su la gjestion dai ûs civics, e al è di podê auspicâ che chest resonament al vegni ripiât cun fuarce dai ents locâi sul teritori, parcè che meti a sisteme lis proprietâts coletivis nol baste.
La Regjon, par esempli, propit intal contest che o sin daûr a fevelâ, e je proprietarie di un compendi agricul: lis dôs aziendis Volpares e Marianis. Si trate di 600 etars di proprietât publiche, un patrimoni economic imobiliâr, agricul e zootecnic di dut rispiet, logât juste apont tra i boscs planiziâi de basse e impreziosît de contiguitât cu la oasi avifaunistiche des fôs dal Stele e la Lagune, e distant dome pôcs chilometris de localitât turistiche di Lignan.
Marianis e Volpares a son stadis ancje lôr in passât proprietâts coletivis (i segns si cjatin in tancj documents), po dopo a son stadis cedudis e, in periodis diviers, a son stadis acuisidis a vari titul de Regjon: Marianis intai agns ’80 dopo dal disfasiment dal Ente Tre Venezie, e Volpares intal 2001 dopo la licuidazion dal Ente Nazionale Cellulosa e Carta.
In dut, se o calcolìn la proprietât regjonâl, lis proprietâts coletivis subietis a ûs civics e chês di proprietât comunâl e regjonâl (chestis ultimis a laressin calcoladis in maniere corete “bens comuns”), o varessin a disposizion un compendi dal dut public di plui o mancul mil etars cence soluzion di continuitât, di valôr enormi (e cun grandis potenzialitâts tal cjamp agri/turistic/ambientâl), che su chel si podaressin disvilupâ progjetualitâts che a laressin a benefici di ducj. Une situazion che e rapresente un unicum a nivel european e che, fin cumò, no je stade disfrutade propit, straçant i sfuarçs e lis ideis che a vegnin dal bas.
Za intal 2002 la Regjon e veve decidût di sprivâsi de Aziende Volpares, metintle inte liste dai bens destinâts ae cartolarizazion e, dome dopo une schirie di protestis e di iniziativis partidis dal teritori, dilunc dal 2003 scuasi dute la Aziende e vignive gjavade da bens cartolarizâts.
Se la oposizion ae vendite e je lade a bon fin, al vûl dî che lis resons par mantignî la aziende in mans publichis a jerin buinis. A son ancjemò. Ancje se il progjet disvilupât in maniere seguitive di incargâts esperts de regjon, dai comuns, de universitât e di altris subiets nol è stât dopo finanziât e fat, il mantigniment in cjâf ae gjestion publiche dal compendi preziôs al veve permetût di scomençâ un percors di costruzion di rêts teritoriâls e colaborazions che, partint de vocazion agricule e de ecelence dal centri di zootecnie di Marianis, si è viert al mont dal sociâl, de formazion e de scuele par diviers agns.
Un esempli concret al è rapresentât dal Cjasâl sociâl che al opere propit a Volpares e al viôt la colaborazion dai Comuns dal Ambit di Tisane, de Aziende pai Servizis Sanitaris n. 5 Basse Furlane, di Aziendis dal privât sociâl e di Ersagricola, e che al à tant che fin il disvilup di ativitâts di agriculture e economie sociâl indreçadis a ativitâts educativis e di socializazion, ancje intun contest di vore di personis svantazadis.
Magari cussì no, ae fin dal 2012, l’Ersa – che al veve in gjestion il compendi par cont de Regjon – al à vendût il ram di aziende Marianis (il cûr de Aziende, cu lis stalis cun plui di 500 esemplârs di ‘pezzata’ rosse) e afitât ancje cuasi ducj i terens di Volpares ai stes acuirents. Dut cuntune procedure avonde discutibile: si va indevant a vendi bens comuns (bens publics), in assence di trasparence, cuintri il volê dal teritori (14 sindics e tancj conseis comunâi si son esprimûts cuintri la vendite) e cence nancje organizâ un minim di gare publiche.
E pensâ che in chescj agns la aziende e il compendi magjic di boscs e aghis che le cenglin al veve inmagât visitadôrs innomenâts (tra chei, par esempli, Andrea Segrè e Serge Latouche), e la idee dai “ribei” che a vevin impedide la vendite intal 2003, ricjapade e abandonade plui voltis dai aministradôrs regjonâi, e je stade ogjet di un master plan butât jù di un dai plui grancj architets dal paisaç a nivel mondiâl, Andreas Kipar, che inte sô vision Volpares Marianis e il teritori ator a varessin podût deventâ il gate de Regjon Friûl – Vignesie Julie ae Expo 2015.
Cuissà ce fin che al à fat chel progjet.
Cu la cession dal ram di aziende Marianis, la Regjon e à rinunziât cumò a davuelzi un rûl strategjic pe valorizazion dal teritori, par catalizâ risorsis publichis e privadis (colaborazion cun proprietâts coletivis, ents locâi, atrazion di fonts comunitaris e di invistidôrs privâts) e soredut par sburtâ un gnûf model di disvilup che al partissi de identitât e des vocazions dal teritori (ambient di presi, agriculture di cualitât, turisim).
Cheste storie e je stade contade ancje inte cunvigne a margjin de Fieste de Tiere 2012 intitulade “I zardinîrs di Diu. Storiis di Resistence ae cancelazion dai lûcs”. Intal volantin di chê cunvigne e jere propit la foto de Aziende Marianis-Volpares: un timp Bens Coletîfs cumò Bens Comuns, e no di cuatri politics e di un consei di aministrazion. Bens di ducj, risorsis, paisaç, teritori, identitât.
Si augurìn che il teritori (massime cui che al à responsabilitâts istituzionâls) al fasi la sô part. E se cualchidun al ves di lâ indevant a pensâ in maniere esclusive a vendi lis zoiis di famee par fâ casse cence pensâ al futûr , ancje cumò – tant che dîs agns indaûr – la peraule di ordin e sarà resisti, resisti, resisti. ❚
✒ Lorenzo Fabbro
LA INTERVISTE - / Toni Capuozzo: «Ognidun al bale cun sô agne»
Oscar Puntel
Nus à lassâts Toni Capuozzo, il grant gjornalist. A son za ce tancj i ricuarts che si viodin ator su di lui, parcé che al jere un om ce tant stimât e amât. Al jere un amì de La Patrie dal Friûl, e al à vût scrit ancje par nô. Sì, par furlan. Parcé che […] lei di plui +
Zovins di gale / Sborf, il zûc par induvinâ e imparâ peraulis par furlan che al à za concuistât miârs di personis
Erika Adami
Daûr un grup zovin che al à a cûr la lenghe furlane Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf […] lei di plui +
Galerie fotografiche / Cuinte edizion di “Stin dongje ae patrie”
Redazion
Pe rassegne Avostanis, Domenie ai 4 di Otubar li dai Colonos si è tignude la cuinte edizion di “Stin dongje ae Patrie“. La storiche riviste furlane e a fât fieste par i siei otante agns e e a cjalât al avignî adun cul mont de culture, de musiche, dal associazionisim, dal sport tal ricuart no […] lei di plui +
Stin dongje ae Patrie / La storiche riviste furlane e fâs fieste par i siei otante agns
Redazion
Pe rassegne Avostanis, Domenie ai 4 di Otubar aes 3 dopomisdì li dai Colonos a Vilecjaze di Listize tierce edizion di Stin dongje ae Patrie. La storiche riviste furlane e fâs fieste par i siei otante agns e e cjale al avignî adun cul mont de culture, de musiche, dal associazionisim, dal sport tal ricuart […] lei di plui +
La piçade / Salts, lavoradôrs e… laris. Almancul i laris a fevelin par furlan
Mastiefumate
Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant […] lei di plui +
Gnovis pai fruts / I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ
Redazion
Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano? ◆ A partî de fin di Jugn al è rivât tes ediculis dal […] lei di plui +



