Amga – Hera une fusion che spuce di gas talian

In cheste corse a puartâ fûr dal Friûl aziendis, imprescj e istituzions fats sù in tancj agns, o vin di zontâ ancje la fusion de Amga cun Hera. Viodût che e tocje un setôr delicât de economie, ma ancje dal ambient, la cuistion e je grivie par dôs resons: la prime pai consumadôrs, par vie dal doman des boletis dal gas, la seconde parcè che cheste fusion e tocjarà o timp o tart la furnidure de aghe.
Lis sieltis di cheste fusion, pal sindic Honsell, a vegnin di une bande de fuarce e des condizions favorevulis de ufierte di Hera e di chê altre de pocje fuarce di Amga, tai confronts des prossimis garis pes assegnazions dai apalts di rêt.
Une debulece dute di verificâ, cul stes criteri des Lateriis Furlanis dulà che cence la proteste, l’acuardi cu la Granarolo al someave tant che naturâl e unic.
Ma la furnidure dal gas, de aghe no la stesse robe che fâ jogurt e strachin: chi si zuin interès une vore plui grues e suntun senari plui larc.
Daûr e je simpri stade la politiche. Ancje in chest câs duncje il suspiet che i partîts a vedin decidût di fâ fûr lis aziendis plui piçulis pai grops plui fuarts, intune logjiche di podê centralist talian, al è plui che legjitim. Di chi la premure di sierâ sot la operazion.
Ma Amga ancje se si clame municipalizade, no je patrimoni dome di Udin, viodût il so pês par tancj comuns furlans. No je dome de citât la responsabilitât de prossime furnidure de aghe tai paîs.
Al è dibant svantâsi di clamâsi Capitâl dal Friûl, cuant che invezit i interès furlans a vegnin daûr di chei forescj.❚
✒ L’om di Buri